Rusiyanın “Qiyamət günü təyyarəsi”nin hissələri oğurlanıb
Rusiyanın “Qiyamət günü təyyarəsi” adlandırılan İl-80 təyyarəsinin bəzi hissələri oğurlanıb.
Novator.az saytı bildirir ki, İl-80 təyyarəsi 1980-ci illərin sonunda istehsal edilmiş İl-86 sərnişin təyyarəsinin bazasında yaradılıb.
İl-80 məxfi təyyarə sayılır. Onun əsas təyinatı iri münaqişələr zamanı yüksək rütbəli şəxslərin, hərbi rəhbərliyin təxliyyəsini həyata keçirmək, onların təhlükəsizliyini təmin etməkdir. Ona görə bu təyyarəyə məcazi mənada “Qiyamət günü təyyarəsi” də deyirlər.
Dövlət sirri hesab olunduğundan təyyarənin texniki üstünlükləri açıqlanmır. Bilinən odur ki, İl-80 tam avtomatik rejimdə işləməyə qadir bir təyyarədir.
Təyyarədən oğurluq olduğunu Rusiyanın Kommersant.ru saytı yazıb. Saytın bildirdiyinə görə, oğurluğun baş verdiyi təyyarə bir müddət əvvəl planlaşdırılma və modernləşdirmə məqsədilə Taqanroqun cənubundakı aerodroma gətirilibmiş.
Oğurluq haqda hüquq mühafizə orqanlarını Berişev adına Taqanroq Elmi-Texniki Aviasiya Kompleksi məlumatlandırıb. Məlumata görə, təyyarənin yük yeri açılıb və 39 radiostansiya bloku, demontaj edilmiş 5 ədəd digər blokun hissələri oğurlanıb.
Rusiya Daxili İşlər Nazirliyi fakt üzrə araşdırma aparıldığını bəyan edib.
Mənbə: Kommersant.ru
