Vüqar Gülməmmədov postunda qalır
Parlamentin 11 dekabr iclasında Hesablama Palatasının sədri postuna təyinat olacaq. Sədr vəzifəsinə qurumun indiki rəhbəri Vüqar Gülməmmədovun namizədliyi irəli sürülüb. Təqdimatı Milli Məclisin sədri verib.
Vüqar Gülməmmədov Hesablama Palatasına 2013-cü ildən sədrlik edir.
Novator.az bildirir ki, Hesablama Palatası Milli Məclisin yaratdığı, kənar dövlət maliyyə nəzarətini həyata keçirən ali audit orqanıdır. Qurumun icmal büdcənin, o cümlədən dövlət büdcəsinin və büdcədənkənar dövlət fondlarının (təsisatlarının) büdcələrinin layihələrinə və icrasına rəy vermək səlahiyyətləri də var.
Palata sədr, sədr müavini və 5 auditordan ibarətdir. Üzvlərin səlahiyyət müddəti 7 ildir, onlar Milli Məclis sədrinin təqdimatı əsasında təyin edilirlər.
1971-ci il aprelin 3-də Bakı şəhərində doğulan Vüqar Gülməmmədov Azərbaycan Dövlət İqtisad Universitetinin məzunudur.
Suraxanı Maşınqayırma Zavodunda tərcüməçi, Suraxanı Rayon Səhiyyə Şöbəsində baş mühasibin müavini, baş mühasib vəzifələrində çalışıb.
Suraxanı Rayon Maliyyə Şöbəsinin (İdarəsinin) müfəttişi, rəis müavini, şöbə müdiri, Səbail Rayon Maliyyə İdarəsinin rəis müavini, şöbə rəisi, Binəqədi Rayon Maliyyə İdarəsinin rəis müavini, sektor rəisi, Yasamal Rayon Maliyyə İdarəsinin rəis müavini, sektor rəisi olub, Hesablama Palatasının iki şöbəsinə müdirlik edib.
22 noyabr 2013-cü ildə Milli Məclisin qərarı ilə Hesablama Palatasının sədri təyin olunub.
