Corc Kluni 20 ildən çoxdur bərbərə getmir
Bir müddət əvvəl ekizlər atası olan, həmişə onu sevənləri təəccübləndirməyi bacaran Hollivud ulduzu Corc Kluni amerikalı teleşou aparıcısı Cim Kimmelin proqramında qonaq olarkən 20 ildən çoxdur bərbərə getmədiyini söyləyib.
Novator.az-ın məlumatına görə, ulduz aktyor məhz belə bir vərdiş qazandığına görə pandemiya dövründə “bərbər problemi” yaşamadığını deyib.
Ondan saçını necə qırxdığını soruşanda isə aktyorun cavabı hamını heyrətləndirib. Kluni bildirib ki, saçını qayçı ilə yox, “Flowbee” markalı tozsoranın dişliyi qırxır.
Məhşur aktyorun cavabı gülüş doğursa da, Corc Kluni zarafat etmədiyini vurğulayıb: “Bu çox asandır, sadəcə aparatı işə salıb tozsoranın həmin hissəsini başında gəzdirməlisən”.
Aparıcının təklifi ilə studiyaya “Flowbee” tozsoranı gətirilib və kino ulduzu saçını necə qırxdığını əyani nümayiş etdirməli olub.
Corc Kluni indən belə də bərbərə getməyəcəyini, buna ehtiyac duymadığını açıqlayıb.
Mənbə: Meduza.io
