Azərbaycanın 4 rəqibi
Dekabrın 7-si İsveçrənin Sürix şəhərində 2022-ci ilin dünya futbol çempionatının Avropa zonası üzrə seçmə mərhələsinin püşkü atılıb. Novator.az-ın məlumatına görə, 55 yığma 10 qrupa bölünüb. Azərbaycan milli komandasına A qrupunda bu rəqiblər qismət olub: Portuqaliya, Serbiya, İrlandiya, Lüksemburq.
Dünya çempionatına çıxmaq üçün qrupda birinci yeri tutmaq gərəkdir. İkinci yeri tutan 10 komanda və 2020-ci ilin Millətlər Liqasının 2 ən yaxşı komandası əlavə oyunlar keçirmək hüququ qazanacaq.
Seçmə mərhələ 2021-ci ilin mart ayında start götürəcək.
2022-ci ilin dünya çempionatı noyabrın 21-dən dekabrın 18-dək Qətərdə keçiriləcək. Reqlamentə görə, final mərhələsində 32 komanda təmsil olunur. Avropanın 13, Afrikanın 5, Asiyanın 4, Cənubi Amerikanın 4, Şimali və Mərkəzi Amerikanın 3 vəsiqəsi var. 2 vəsiqə Asiya, Cənubi Amerika, Okeaniya, Şimali və Mərkəzi Amerika təmsilçiləri arasında əlavə oyunlarda müəyyənləşir, 1 vəsiqə meydan sahibinə verilir.
1930-cu ildən keçirilən dünya futbol çempionatlarında Braziliya 5 dəfə, İtaliya və Almaniya 4 dəfə, Uruqvay, Argentina və Fransa 2 dəfə, İngiltərə və İspaniya 1 dəfə qızıl medallara sahib olub.
