Əmanətlərin qorunması: sistem dəyişir
Azərbaycanda illik faiz dərəcəsi milli valyutada 12 faizdən, xarici valyutada 2,5 faizdən yüksək olmayan əmanətlər tam sığortalanıb. Bu, 2016-cı il martın 4-dən qüvvədə olan “Əmanətlərin tam sığortalanması haqqında” qanunun tələbidir. Milli Məclis həmin qanunun müddətini 5 aprel 2021-ci ilədək uzatmağa hazırlaşır.
Mərkəzi Bankın 7 dekabr məlumatına görə, Əmanətlərin Sığortalanması Fondu əmanətlərin sığortalanması mexanizminin yeni çərçivəsinə dair hərtərəfli strategiya hazırlayıb. Strategiya əsasında “Əmanətlərin sığortalanması haqqında” qanuna bu dəyişikliklər təklif olunub:
– fiziki şəxslərin qorunan əmanətləri üzrə kompensasiya məbləğinin 30 min manatdan 100 min manata (xarici valyutada 100 min manat ekvivalentinədək) artırılması;
– sahibkarlıq fəaliyyəti ilə məşğul olan fiziki şəxslərin bank hesablarında olan vəsaitləri üzrə kompensasiya məbləğinin 20 min manat müəyyən edilməklə sığortalanması;
– notariusların depozit hesablarında qalmış, fiziki şəxslərə məxsus pul vəsaitlərinin tam məbləğdə sığortalanması.
Bu yeniliklərin 5 aprel 2021-ci ildən qüvvəyə minməsi nəzərdə tutulur.
