Respublikaçı deputatlardan 27-si Trampın uduzduğunu etiraf edib
ABŞ Konqresinin respublikaçı üzvlərindən 27-si builki prezident seçkisində Donald Trampın uduzduğunu, Cozef Baydenin qalib gəldiyini etiraf edib.
Novator.az bildirir ki, xəbəri ABŞ-ın “Vashinqton Post” qəzeti yayıb.
ABŞ Konqresi iki palatadan – Nümayəndələr Palatası və Senatdan ibarətdir. Hər iki palatada Respublikaçılar Partiyasının ümumilikdə 249 üzvü təmsil olunur.
“Vaşinqton Post”un müxbirləri Baydenin seçkidəki qələbəsini tanıyıb-tanımadıqlarını öyrənmək üçün Konqresin hər iki palatasında təmsil olunan respublikaçıların hamısının köməkçiləri ilə əlaqə saxlayıblar. Jurnalistlər respublikaçı deputatlardan 220-sinin mövqeyi barədə suala birbaşa cavab ala bilməyiblər. Deputatlardan 27-sinin Cozef Baydenin qələbəsini tanıdığı, 2-sinin isə Donald Trampın prezident seçildiyi iddiasında olduğu aydınlaşıb.
Eyni zamanda bəlli olub ki, dekabrın 14-də Seçicilər Kollegiyası Cozef Baydeni dəstəkləsə, respublikaçı deputatlardan 30-u bu qələbəni tanıyacaq.
ABŞ-da prezident seçkisi üzrə ümumxalq səsverməsi noyabrın 3-də keçirilib. Əsas rəqabət Respublikaçılar Partiyasının namizədi, hazırkı prezident Donald Trampla Demokratlar Partiyasının namizədi Cozef Bayden arasında gedib.
ABŞ-da prezidenti 538 nəfərlik Seçicilər Kollegiyası seçir. Demokratlar Partiyası Seçicilər Kollegiyasına daha çox nümayəndə qazandığına görə Cozef Bayden qalib elan olunub.
Seçicilər Kollegiyası prezident seçkisi ilə bağlı yekun qərarını dekabrın 14-də verəcək, sonra həmin səsvermənin nəticəsi Konqresin iclasında təsdiqlənəcək.
Yeni seçilmiş prezidentin andiçmə mərasimi 2021-ci il yanvarın 20-də olacaq.
Mənbə: Washingtonpost.com
