Kremlin sözçüsü Çubaysın işdən çıxarılmasından danışıb
Rusiya prezidentinin sözçüsü Dmitri Peskov Anatoli Çubaysın “Rosnano” Səhmdar Cəmiyyətinin sədri vəzifəsindən azad olunması ilə bağlı yaranan ajiotaja, söz-söhbətlərə təəccübləndiyini bildirib.
Novator.az-ın məlumatına görə, Kremlin sözçüsü deyib ki, Çubays 2008-ci ildən Rusiya Nanotexnologiyalar Şirkətinin baş direktoru olub, 2011-ci ildən isə bu şirkətin bazasında yaradılmış “Rosnano”ya sədrlik edib və indi onun başqası ilə əvəz olunmasına təbii hadisə kimi baxılmalıdır: “O ki qaldı Çubaysın gələcək fəaliyyətinə, bu barədə nəsə deyə bilmərəm. Bununla bağlı hər hansı informasiyam yoxdur”.
Dmitri Peskov həmçinin Rusiya prezidenti Vladimir Putinin Çubaysı işdən çıxararkən qəbul etmədiyini, yalnız “Rosnano”nun yeni sədri Sergey Kulikovla görüşdüyünü və burada da qeyri-adi heç nə olmadığını söyləyib.
65 yaşlı Anatoli Çubays 1990-cı illərdə Rusiya baş nazirinin müavini olub, sonralar da hökumətdə və dövlət şirkətlərində mühüm postlar tutub. O, 1990-cı illərdə Rusiyada sosialist iqtisadiyyatından bazar iqtisadiyyatına keçidin əsas müəlliflərindən sayılır.
Mənbə: Lenta.ru
