Bakı Apellyasiya Məhkəməsi məhbus jurnalist Əfqan Sadıqovun şikayətinə baxacaq. İlk prosesin dekabrın 4-nə təyin olunduğu xəbərini yayan vəkil Elçin Sadıqov jurnalistin səhhətinin pisləşdiyini vurğulayıb: “Aclığı davam etdirir. Vəziyyəti çox ağırdır. Dekabrın 2-də Bakı İstintaq Təcridxanasının rəisi Elnur İsmayılova müraciət etdim ki, Əfqan təcili xəstəxanaya köçürülsün. Elnur İsmayılov bu məsələnin onun səlahiyyətimdə olmadığını bildirdi. Əfqanın başına bir iş gəlsə, hakimiyyət, Ədliyyə Nazirliyi, hər kəs cavab verəcək”.

Novator.az bildirir ki, Əfqan Sadıqov Azel.tv saytının baş redaktorudur. Jurnalisti bu il mayın 13-də Baş Prokuror yanında Korrupsiyaya Qarşı Mübarizə Baş İdarəsi tutub. Noyabrın 3-də Bakı Ağır Cinayətlər Məhkəməsi onu xeyli miqdarda əmlakı hədə-qorxu ilə tələb etmədə təqsirli bilərək 7 il müddətinə azadlıqdan məhrum edib.

Eyni iş üzrə Xeberfakt.az saytının baş redaktoru Sakit Muradova 5 il müddətinə şərti həbs cəzası verilib.

Hökmə etiraz edən Əfqan Sadıqov noyabrın 4-dən aclıq aksiyasına başlayıb. Noyabrın 17-də o, saxlandığı Bakı İstintaq Təcridxanasının tibb məntəqəsinə köçürülüb.

Əfqan Sadıqov 2016-cı il noyabrın 22-dən 2018-ci il mayın 22-dək həbsdə olub. O zaman jurnalist Cəlilabad Rayon Məhkəməsinin çıxardığı hökmlə xuliqanlıq niyyəti ilə təhlükəli üsulla sağlamlığa qəsdən az ağır ziyan vurmada təqsirli bilinib.