Britaniyada kütləvi vaksinasiyaya cavabdeh şəxs təyin olundu
Böyük Britaniyada koronavirusun qarşısını almaq məqsədilə kütləvi vaksinasiyaya hazırlıq görülür. Artıq hökumət ölkədə vaksinasiya prosesinə cavabdeh şəxsi də müəyyənləşdirib.
Novator.az saytı “The Guardian” qəzetinə istinadla xəbər verir ki, həmin şəxs Britaniya parlamentinin üzvü, hakim Mühafizəkarlar Partiyasının təmsilçisi, dövlət katibinin parlamentdəki biznes, energetika və sənaye strategiyası məsələləri departamenti üzrə müavini Nadim Zahavidir.
Vaksinasiyaya nəzarəti həyata keçirməsi üçün Zahaviyə əlavə vəzifə də verilib – o, səhiyyə nazirinin müavini təyin olunub.
Səhiyyə və sosial təminat naziri Mett Henkok bu təyinatdan məmunluq ifadə edib. Nazir “Twitter” səhifəsində yazıb: “İndi Milli Səhiyyə Xidmətinin qarşısında böyük bir vəzifə, böyük bir məsuliyyət durur. Biz bütün Britaniya üzrə vaksinasiyaya başlayırıq”.
Nadim Zahavi 1967-ci ildə İraqda doğulub. Milliyyətcə kürddür. 9 yaşında ailəsi ilə birgə Britaniyaya mühacirət edib. 1991-ci ildən ictimai-siyasi fəaliyyət göstərir. Məşhur “YouGov” ictimai rəyin öyrənilməsi mərkəzinin təsisçilərindən biridir. 2010-cu ildən Britaniya parlamentində təmsil olunur. İxtisasca kimya mühəndisidir.
2019-cu ilin dekabrında Çində üzə çıxaraq dünyanı bürüyən koronavirus infeksiyası indiyədək milyon yarıma yaxın adamın həyatına son qoyub. Ölümlərin 58 mindən çoxu Britaniyada baş verib.
Mənbə: Theguardian.com
