Hansı suallara aydınlıq gəlib?
UEFA-nın klub turnirlərinin qrup raundunda sona iki tur qalır. Novator.az bildirir ki, 32 klubun yer aldığı Çempionlar Liqasında İngiltərə və İspaniyanın 2, İtaliya və Almaniyanın 1 komandası 1/8 finala vəsiqəni təmin edib.
48 komandanın yarışdığı Avropa Liqasından İngiltərənin 2, İtaliya və Almaniyanın 1 komandası 1/16 finala erkən bilet alıb. Azərbaycanın turnirdəki nümayəndəsi “Qarabağ” xalsızdır və növbəti raund şansını itirib.
Hər iki turnir üzrə Danimarka, Bolqarıstan, İrlandiyanın təmsilçisiz qalacağı da dəqiqləşib.
Klub reytinqində Azərbaycan 16,625 əmsalla 55 UEFA üzvü arasında 26-cı sırada durur.
Rusiya 7-ci, Ukrayna 12-ci, Türkiyə 13-cü, Qazaxıstan 27-ci, Belarus 29-cu, Litva 34-cü, Ermənistan 39-cu, Latviya 40-cı, Gürcüstan 43-cü, Moldova 45-ci, Estoniya 53-cü pillədə qərarlaşıb.
Reytinqə İspaniya başçılıq edir: 88,855 əmsal. Onun ən yaxın təqibçisi 87,426 əmsalla İngiltərədir.
Klub reytinqi Çempionlar Liqası və Avropa Liqasında son beş mövsümdə qazanılan əmsala əsaslanır.
Qrup raundunda qələbə 2 xal, heç-heçə 1 xaldır. Çempionlar Liqasının 1/8 finalına çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Mənbə: Kassiesa.net
