Azərbaycanı UEFA Avropa Liqasının qrup raundunda təmsil edən “Qarabağ” dördüncü oyununu keçirib. Novator.az-ın məlumatına görə, İ qrupunda yarışan komanda noyabrın 26-sı İstanbulda Türkiyə “Sivasspor”una 2:3 hesabı ilə uduzaraq 1/16 finala çıxmaq şansını itirib.

Lider – İspaniyanın “Vilyarreal” klubu səfərdə İsrail “Makkabi”si (Tel-Əviv) ilə xalları bölüb – 1:1.

Dörd turdan sonra ispanlar 10, israillilər 7, sivaslılar 6 xal yığıb, ağdamlılar xalsızdır.

Qalan oyunların təqvimi belədir:

3 dekabr

“Qarabağ” – “Makkabi”

“Sivasspor” – “Vilyarreal”

10 dekabr

“Vilyarreal” – “Qarabağ”

“Makkabi” – “Sivasspor”.

Növbəti mərhələyə çıxmaq üçün qrupda azı ikinci yeri tutmaq gərəkdir.

Azərbaycanda UEFA bayrağı altında oyunlar keçirilməsi müvəqqəti yasaqlandığı üçün “Qarabağ” ev oyunlarını neytral meydanda keçirməli olur.

26 noyabr oyunlarında digər qruplardan “Roma” (İtaliya), “Arsenal” (İngiltərə), “Lester” (İngiltərə) və “Hoffenhaym” (Almaniya) növbəti mərhələyə vəsiqəni təmin ediblər.

Qrup mərhələsində yarışan 6 komandanın 1971-ci ildən keçirilən, 2008-cı ilədək UEFA kuboku adlanmış turnirdə zəfəri var. “Tottenhem”, “Feyenoord” 2, PSV, “Bayer”, “Napoli”, SSKA (Moskva) 1 uğur qazanıb.

Mənbə: Football.kulichki.net