Ermənistan prezidenti Armen Sərkisyan noyabrın 26-da baş nazir Nikol Paşinyanın təqdimatına baxaraq Vaan Kerobyanı iqtisadiyyat naziri təyin edib. Novator.az-ın məlumatına görə, o, noyabrın 24-də istefa vermiş Tiqran Xaçatryanı əvəzləyib.

Tiqran Xaçatryan hökumətdə 2018-ci ildən təmsil olunub, 2019-cu ilədək iqtisadi inkişaf və investisiyalar naziri postunu tutub.

Noyabr ayında Nikol Paşinyanın hökumətində xarici işlər naziri, müdafiə naziri, fövqəladə hallar naziri, əmək və sosial məsələlər naziri, elm, təhsil, mədəniyyət və idman naziri də dəyişib.

Ermənistan hökumətində baş nazirin iki müavini və 12 nazir var.

Baş nazirin müavini postlarını Tiqran Avinyan və Mger Qriqoryan tuturlar.

Ara Ayvazyan xarici işlər naziri, Vaqarşak Arutyunyan müdafiə naziri, Rustam Badasyan ədliyyə naziri, Andranik Piloyan fövqəladə hallar naziri, Atom Cancuqazyan maliyyə naziri, Akob Arşakyan yüksək texnologiyalar sənayesi naziri, Suren Papikyan ərazi idarəçiliyi və infrastruktur naziri, Mesrop Arakelyan əmək və sosial məsələlər naziri, Vaqram Dumanyan elm, təhsil, mədəniyyət və idman naziri, Arsen Torosyan səhiyyə naziri, Romanos Petrosyan ətraf mühit naziridir.

1975-ci il təvəllüdlü Nikol Paşinyan Vətəndaş Sazişi Partiyasının lideridir. Hökumətə 2018-ci il mayın 8-dən başçılıq edir.

Mənbə: Armeniasputnik.am