Naxçıvan Muxtar Respublikasının Dövlət Statistika Komitəsi yeni göstəricilər açıqlayıb. Novator.az bildirir ki, rəsmi hesabata görə, 2020-ci ilin yanvar-oktyabr aylarında muxtar respublikada 2 milyard 292,9 milyon manatlıq ümumi daxili məhsul istehsal olunub, bu da 2019-cu ilin on ayı ilə müqayisədə 0,9 faiz çoxdur.

Adambaşına ümumi daxili məhsulun həcmi 4978,2 manat göstərilir.

2019-cu ilin yanvar-oktyabr aylarına nəzərən sənayedə 1,3 faiz, sərmayə qoyuluşunda 1 faiz, kənd təsərrüfatında 4,2 faiz artım olduğu vurğulanır.

Statistikaya əsasən, on ayda informasiya və rabitə xidmətlərinin dəyəri 2019-cu ilin eyni dövründəki xidmətlərin dəyərini 4,4 faiz üstələyib.

Hüquqi və fiziki şəxslərə 153 milyon 793,5 min manat məbləğində kredit (bir il öncəki göstəricidən 1,4 dəfə çox) verildiyi qeyd olunur.

Statistika qurumu həmçinin bildirir ki, muxtar respublikada 384 növdə məhsul istehsal olunur, 350 növdə məhsula tələbat yerli imkanlar hesabına ödənir.

Hesabata əsasən, yanvar-oktyabr aylarında 386,8 milyon ABŞ dolları dəyərində xarici ticarət dövriyyəsi qeydə alınıb. Bunun 334 milyon 49 min dolları ixracdır.

Oktyabrın 1-nə muxtar respublika iqtisadiyyatında bir işçiyə hesablanmış orta aylıq əməkhaqqı 528 manat məbləğində rəsmiləşib.