Ermənistanın baş naziri Nikol Paşinyan hökumətini qismən yeniləyib: xarici işlər naziri, müdafiə naziri, fövqəladə hallar naziri, əmək və sosial məsələlər naziri, elm, təhsil, mədəniyyət və idman naziri dəyişib.

Novator.az bildirir ki, hazırda hökumətdə baş nazirin iki müavini və 12 nazir var.

Baş nazirin müavini postlarını Tiqran Avinyan və Mger Qriqoryan tuturlar.

Ara Ayvazyan xarici işlər naziri, Vaqarşak Arutyunyan müdafiə naziri, Rustam Badasyan ədliyyə naziri, Andranik Piloyan fövqəladə hallar naziri, Atom Cancuqazyan maliyyə naziri, Tiqran Xaçatryan iqtisadiyyat naziri, Akob Arşakyan yüksək texnologiyalar sənayesi naziri, Suren Papikyan ərazi idarəçiliyi və infrastruktur naziri, Mesrop Arakelyan əmək və sosial məsələlər naziri, Vaqram Dumanyan elm, təhsil, mədəniyyət və idman naziri, Arsen Torosyan səhiyyə naziri, Romanos Petrosyan ətraf mühit naziridir.

1975-ci il təvəllüdlü Nikol Paşinyan Vətəndaş Sazişi Partiyasının lideridir. Hökumətə 2018-ci il mayın 8-dən başçılıq edir. Əksəriyyəti onun partiyasının üzvü olan “Mənim addımım” bloku 132 deputatdan ibarət parlamentdə 85 mandatla təmsil edilir.