Aclıq edən jurnalist sudan da imtinaya hazırlaşır
Bakı İstintaq Təcridxanasında aclıq aksiyası keçirən məhbus jurnalist Əfqan Sadıqovun səhhəti ağırlaşıb. Noyabrın 17-si axşam o, tibb məntəqəsinə köçürülüb. Xəbəri vəkil Elçin Sadıqov yayıb. Onun sözlərinə görə, jurnalist qida tərkibli dərmanların vurulmasına icazə vermir, sudan da imtina etməyə hazırlaşır.
Novator.az bildirir ki, Əfqan Sadıqov Azel.tv saytının baş redaktorudur. Jurnalisti bu il mayın 13-də Baş Prokuror yanında Korrupsiyaya Qarşı Mübarizə Baş İdarəsi tutub. Noyabrın 3-də Bakı Ağır Cinayətlər Məhkəməsi onu xeyli miqdarda əmlakı hədə-qorxu ilə tələb etmədə təqsirli bilərək 7 il müddətinə azadlıqdan məhrum edib.
Eyni iş üzrə Xeberfakt.az saytının baş redaktoru Sakit Muradova 5 il müddətinə şərti həbs cəzası verilib.
Hökmə etiraz edən Əfqan Sadıqov noyabrın 4-dən aclıq aksiyasına başlayıb.
Əfqan Sadıqov 2016-cı il noyabrın 22-dən 2018-ci il mayın 22-dək həbsdə olub. O zaman jurnalist Cəlilabad Rayon Məhkəməsinin çıxardığı hökmlə xuliqanlıq niyyəti ilə təhlükəli üsulla sağlamlığa qəsdən az ağır ziyan vurmada təqsirli bilinib.
