Ənvər Börüsoyun müalicəsi üçün müraciət olunub
Tanınmış jurnalist Ənvər Börüsoy onkoloji xəstəlikdən əziyyət çəkir. “Hürriyyət” qəzetinin yazdığına görə, Milli Məclisin deputatı Aqil Abbas və bir qrup jurnalist (Qulu Məhərrəmli, Elçin Şıxlı, Arif Əliyev, Umud Mirzəyev, Yadigar Məmmədli, Sevil Yusifova, Vüqar Məmmədov, Yunus Oğuz, Rauf Arifoğlu, Asif Mərzili, Akif Aşırlı, Rəfael Becanov) Heydər Əliyev Fondunun prezidenti, Azərbaycanın birinci vitse-prezidenti Mehriban Əliyevaya müraciət edərək Ənvər Börüsoyun müalicəsinə yardım göstərilməsini istəyiblər.
Ənvər Börüsoy türk dünyası, Qafqaz və Orta Şərqin ictimai, siyasi, mədəni və sosial həyatını araşdıran yazıları ilə tanınır. O, “Hürriyyət” qəzetinin 17 noyabr sayında dərc olunmuş müsahibəsində bildirir ki, ağ ciyərində onkoloji problem 2019-cu ilin avqustunda üzə çıxıb, bir müddət Təbrizdə müalicə alıb: “Çox peşəkar həkimlər idilər. Dərmanları da olduqca keyfiyyətli idi. 2020-ci ilin fevral ayına kimi orada müalicə olundum. Pandemiya olayı çıxınca və yollar bağlandığı üçün müalicəm də yarımçıq qaldı. Bu ilin avqust ayında xəstəliyim yenidən şiddətlənməyə başladı. Ona görə də Milli Onkologiya Mərkəzinə müraciət etdim”.
Jurnalist qeyd edir ki, bir il bütün imkanlarını səfərbər edərək müalicə ala bilib: “Ancaq indi bütün imkanlarım tükənib. Dostlarım təkidlə bildirdilər ki, Heydər Əliyev Fonduna müraciət olunsun”.
Ənvər Börüsoyun sözlərinə görə, Təbrizdə üç dəfə kimyəvi terapiya alıb, Bakıda dörd dəfə müalicə kursu keçib, ancaq səhhətində ciddi irəliləyiş yoxdur: “Müalicəni keyfiyyətli şəkildə davam etdirmək maddi imkanlara bağlanır. Mənim qazancım o qədər deyil ki, bütün bunların öhdəsindən gələ bilim. Həkimlər deyirlər vaxtlı-vaxtında müalicəmi davam etdirməsəm, ağ ciyərimdəki şişlər sürətlə böyüyə bilər”.
