“Microsoft”un Rusiya və Şimali Koreya hakerləri haqda xəbərdarlığı
ABŞ-ın “Microsoft” şirkəti koronavirusa qarşı vaksin sınaqları keçirən əczaçılıq şirkətlərinin məlumat bazalarına kiber hücumların olduğunu açıqlayıb.
Novator.az-ın məlumatına görə, şirkət hücumları Rusiya və Şimali Koreya hakerlərinin həyata keçirdiyini iddia edib.
“Microsoft”un məlumatına görə, hakerlərin hədəfi ABŞ, Kanada, Fransa, Hindistan və Cənubi Koreyadakı aparıcı əczaçılıq şirkətlərinin və ayrı-ayrı vaksin tədqiqatçılarının apardığı araşdırmalar haqda informasiyalar əldə etməkdir.
“Microsoft” bildirib ki, hakerlərin hədəf aldığı şirkətlərin əksəri vaksin sınaqlarının mühüm mərhələsindədir. Şirkətlərin çoxu kiber hücumları dəf etsə də, bəzi hakerlər müəyyən məlumatları oğurlaya biliblər.
“Microsoft” hədəfə alınan bütün təşkilatları xəbərdar etdiyini vurğulayıb.
“Microsoft” əsas üç haker qrupunu – rusiyalılardan ibarət ”Strontium”, koreyalılardan ibarət “Sink” və “Serium” qruplarını ittiham edib.
Mənbə: Thehindu.com
