Hikmət Hacızadə necədir?
Novator.az saytı politoloq Hikmət Hacızadənin səhhəti ilə maraqlanıb.
Politoloq noyabrın 11-də insult keçirərək Bakıdakı Respublika Müalicə-Diaqnostika Mərkəzinin reanimasiya şöbəsinə yerləşdirilib.
Hikmət Hacızadənin xanımı Bahar Hacızadə noyabrın 17-də Novator-az-a deyib ki, yoldaşı koma vəziyyətindədir, səhhətində ciddi bir irəliləyiş yoxdur.
Hikmət Hacızadə 1954-cü ildə Bakıda doğulub. Bakı Dövlət Universitetinin fizika fakültəsini bitirib. Fizika-riyaziyyat elmləri namizədidir. Elmlər Akademiyasının Fizika İnstitutunda böyük elmi işçi vəzifəsində çalışıb.
Milli azadlıq hərəkatının (1988-1991) liderlərindəndir. Azərbaycan Xalq Cəbhəsinin “Svoboda” qəzetinin redaktoru olub.
Əbülfəz Elçibəyin prezidentliyi dövründə (1992-1993) baş nazirin müavini, Azərbaycanın Rusiya paytaxtı Moskvada səlahiyyətli nümayəndəsi postlarını tutub.
1993-2015-ci illərdə Müsavat Partiyasının üzvü olub.
İqtisadi və Siyasi Araşdırmalar Mərkəzinin qurucusudur.
