“Fox News”: Dünyada daha bir şanslı vaksin ortaya çıxdı
Dünyada koronavirus əleyhinə sınaqdan keçirilən daha bir şanslı vaksin ortaya çıxıb.
Novator.az saytı “Fox News” kanalına istinadla xəbər verir ki, söhbət ABŞ-ın “Moderna” şirkətinin hazırladığı vaksindən gedir.
Noyabrın 16-da bu vaksinin kliniki sınaqlar zamanı 94,5% effekt verdiyi açıqlanıb.
Noyabrın 9-da Almaniyanın “BioNTech” və ABŞ-ın “Pfizer” şirkətlərinin birlikdə hazırladığı vaksinin 90% effekt verdiyi bəyan olunmuşdu. Ona görə də “BioNTech” və “Pfizer” şirkətlərinin vaksini indiyədək dünyada koronavirusa qarşı ən şanslı vaksin sayılırdı.
“Moderna”nın açıqlaması ən şanslı ikinci vaksinin meydana çıxması deməkdir.
“Moderna” vaksin və dərmanlar hazırlayan biotexnologiya şirkətidir. 2010-cu ildə yaradılıb. Şirkətin prezidenti doktor Stiven Hokdur.
“Moderna” şirkəti koronavirusa qarşı vaksini ABŞ-ın Milli Allergiya və İnfeksion Xəstəliklər İnstitutu ilə birgə hazırlayıb.
İnstitutun direktoru, tədqiqatçı alim, immunoloq, infeksionist Entoni Fauçi “Moderna”nın 94,5%-lik effekt haqda açıqlamasını təsdiqləyib. Entoni Fauçi bu hadisəni böyük uğur kimi qiymətləndirib.
“Moderna”nın açıqlamasından dərhal sonra şirkətin səhmləri 12 faizdən çox bahalaşıb.
Mənbə: Foxnews.com
