Bu il orta maaş necə dəyişib?
Dövlət Statistika Komitəsi iqtisadiyyatda işləyənlərin sayı və əməkhaqqı barədə hesabat yayıb. Novator.az bildirir ki, rəsmi açıqlamaya görə, 2020-ci il oktyabrın 1-nə ölkə iqtisadiyyatında muzdla çalışan işçilərin sayı 1 milyon 681,6 min nəfər olub, onların 908 mini dövlət sektorunda, 773,6 mini qeyri-dövlət sektorunda fəaliyyət göstərib.
Hesabata əsasən, yanvar-sentyabr aylarında muzdla çalışan işçilərin orta aylıq nominal əməkhaqqı əvvəlki ilin doqquz ayına nisbətən 17,1 faiz artaraq 706,6 manat məbləğində rəsmiləşib.
Yanvarın 1-nə orta maaş 634,8 manat, fevralın 1-nə 712,1 manat, martın 1-nə 712,3 manat, aprelin 1-nə 744,5 manat, mayın 1-nə 736,2 manat, iyunun 1-nə 728,9 manat, iyulun 1-nə 720 manat, avqustun 1-nə 715,4 manat, sentyabrın 1-nə 710,2 manat göstərilmişdi.
Başqa bir rəsmi məlumatda qeyd olunur ki, yanvar-oktyabr aylarında əsas kapitala 11 milyard 540,2 milyon manat məbləğində, 2019-cu ilin on ayı ilə müqayisədə 2,1 faiz az vəsait yönəldilib: “Neft-qaz sektoruna yatırılmış investisiyaların həcmi 11,7 faiz artıb, qeyri neft-qaz sektoruna yönəldilən vəsaitin həcmi 9,9 faiz azalıb”.
