Baş Prokurorluğun rəsmi hesabatına görə, Ermənistan silahlı qüvvələrinin Azərbaycanın yaşayış məntəqələrini atəşə tutması nəticəsində sentyabrın 27-dən noyabrın 9-dək 93 mülki şəxs həlak olub, 407 nəfər xəsarət alıb, 3326 yaşayış evi, 120 çoxmənzilli bina, 504 mülki obyekt dağılıb.
Prezident İlham Əliyevin 6 noyabr sərəncamı ilə mülki əhaliyə, dövlət əmlakına, o cümlədən infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsini və aradan qaldırılmasını təmin etmək məqsədilə dövlət komissiyası yaradılıb.
Baş nazir Əli Əsədovun sədrlik etdiyi komissiyaya Şahin Mustafayev (baş nazirin müavini), Anar Ələkbərov (prezidentin köməkçisi), Zeynal Nağdəliyev (prezidentin köməkçisi, administrasiyanın ərazi-təşkilat məsələləri şöbəsinin müdiri), Şahmar Mövsümov (prezidentin köməkçisi, administrasiyanın iqtisadi məsələlər və innovativ inkişaf siyasəti şöbəsinin müdiri), Gündüz Kərimov (Prezident Administrasiyasının qanunvericilik və hüquq siyasəti şöbəsinin müdiri, birinci vitse-prezidentin köməkçisi), Xalid Əhədov (birinci vitse-prezidentin köməkçisi), Kəmaləddin Heydərov (fövqəladə hallar naziri), Mikayıl Cabbarov (iqtisadiyyat naziri), Samir Şərifov (maliyyə naziri), Ceyhun Bayramov (xarici işlər naziri), Anar Quliyev (Dövlət Şəhərsalma və Arxitektura Komitəsinin sədri), Kamran Əliyev (baş prokuror) daxildir.
Mülki əhaliyə, dövlət əmlakına, o cümlədən infrastruktur obyektlərinə, habelə sahibkarlıq fəaliyyəti subyektlərinə dəymiş ziyanın qiymətləndirilməsi iki ay müddətində təmin edilməlidir.
1988-ci ildə Ermənistan Azərbaycanın Dağlıq Qarabağ bölgəsini ələ keçirmək üçün təcavüzə başlayıb. 1991-ci ildən təcavüz şiddətlənərək hərbi fazaya keçib. 1994-cü ildə atəşkəslə dayanan müharibədə Ermənistan Dağlıq Qarabağdakı Xankəndi şəhərini, Şuşa, Xocalı, Xocavənd rayonlarını, keçmiş Ağdərə rayonunu və Dağlıq Qarabağ ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) işğal edib.
2020-ci il sentyabrın 27-dən Azərbaycan Ordusunun keçirdiyi əməliyyatlarda noyabrın 9-dək Cəbrayıl şəhəri və rayonun 90 kəndi, Füzuli şəhəri və rayonun 53 kəndi, Zəngilan şəhəri, rayonun 3 qəsəbəsi və 52 kəndi, Xocavənd rayonunun 1 qəsəbəsi və 35 kəndi, keçmiş Ağdərə rayonunun Tərtərə aid 3 kəndi, Qubadlı şəhəri və rayonun 41 kəndi, Xocalı rayonunun 9 kəndi, Şuşa şəhəri, Laçın rayonunun 3 kəndi azad olunub.
Azərbaycan prezidenti İlham Əliyev, Ermənistanın baş naziri Nikol Paşinyan və Rusiya prezidenti Vladimir Putinin birgə bəyanatı əsasında noyabrın 10-dan münaqişə zonasında atəş və bütün hərbi əməliyyatlar tam dayandırılır.
Razılaşmaya görə, Ermənistan noyabrın 15-dək Kəlbəcər rayonunu, noyabrın 20-dək Ağdam rayonunu, dekabrın 1-dək Laçın rayonunu Azərbaycana qaytarır.
Ermənistan silahlı qüvvələri 44 günlük müharibədə Tərtər, Goranboy, Bərdə, Yevlax, Ağcabədi, Beyləqan, Füzuli, Ağdam rayonlarını, Gəncə, Mingəçevir şəhərlərini və başqa əraziləri (Daşkəsən, Gədəbəy, Göygöl, Kürdəmir, Qəbələ, Abşeron, Xızı, Siyəzən) atəşə tutub.
