Seçki yarışından yeni nəticələr
Novator.az ABŞ-da noyabrın 3-də keçirilmiş ümumxalq səsverməsinin nəticələrinə nəzər salıb.
Prezident seçkisində Demokratlar Partiyasından Cozef Bayden qalib gəlir. O, 538 nəfərlik Seçicilər Kollegiyasına 290 nümayəndə qazanaraq önə çıxıb.
Prezident seçilmək üçün 270 səs kifayət edir.
Respublikaçılar Partiyasının namizədi olan prezident Donald Tramp Seçicilər Kollegiyasına hələlik 214 nümayəndə keçirə bilib.
ABŞ 50 ştat və 1 federal dairədən ibarətdir.
Alyaska (Seçicilər Kollegiyasında 3 nəfərlə təmsil olunur), Şimali Karolina (15 nəfər) və Corciya (16 nəfər) ştatlarında səsvermənin nəticəsi bəlli deyil.
İndiki nəticələrə əsasən, demokrat Kamala Harris vitse-prezident olur.
Seçicilər Kollegiyası prezident seçkisi ilə bağlı yekun qərarını verəndən sonra həmin səsvermənin nəticəsi Konqresin iclasında təsdiqlənməlidir.
Prezident və vitse-prezidentlə yanaşı Konqresin yuxarı palatasının – Senatın 35 üzvü, alt qanadı – Nümayəndələr Palatası, bəzi ştat və ərazilərdə qubernatorlar, həmçinin yerli özünüidarəetmə orqanları seçilib.
3 noyabr seçkilərinin ilkin nəticələrinə görə, 100 yerlik Senatda indi həm Respublikaçılar Partiyasının, həm Demokratlar Partiyasının 48 nümayəndəsi var.
435 nəfərlik Nümayəndələr Palatasında demokratlar 215, respublikaçılar 198 konqresmenlə təmsil olunur.
