ABŞ-da prezident dəyişir
ABŞ-da noyabrın 3-də keçirilmiş prezident seçkisinin ilkin nəticələri yenilənib. Novator.az-ın məlumatına görə, noyabrın 7-də Demokratlar Partiyasından Cozef Baydenin 538 nəfərlik Seçicilər Kollegiyasına 290 nümayəndə qazanaraq önə çıxdığı bəyan olunub.
Prezident seçilmək üçün 270 səs kifayət edir.
Respublikaçılar Partiyasının namizədi olan prezident Donald Tramp Seçicilər Kollegiyasına hələlik 214 nümayəndə keçirə bilib.
Cozef Bayden 1942-ci il noyabrın 20-də Pensilvaniya ştatının Skrenton şəhərində doğulub.
1965-ci ildə Delaver Universitetini tarix və politologiya ixtisasları ilə, 1968-ci ildə Sirakus Universitetinin Hüquq Məktəbini bitirib.
1972, 1978, 1984, 1990, 1996, 2002 və 2008-ci illərdə ABŞ Konqresinin yuxarı palatası olan Senatın üzvü seçilib.
1987-1995-ci illərdə Senatın Məhkəmə Komitəsinə, 2001-2003 və 2007-2009-cu illərdə Xarici Əlaqələr Komitəsinə sədrlik edib.
2009-2017-ci illərdə – Barak Obamanın prezidentliyi dövründə vitse-prezident postunu tutub.
Cozef Baydenin ilk həyat yoldaşı 1972-ci ildə qızı ilə birlikdə avtomobil qəzasında həlak olub. Həmin nikahdan Cozef Baydenin bir oğlu var. Onun digər oğlu 2015-ci ildə vəfat edib.
1977-ci ildə yenidən ailə quran Cozef Bayden ikinci nikahdan bir qız atasıdır.
1946-cı il təvəllüdlü Donald Tramp 2016-cı il noyabrın 8-də keçirilmiş prezident seçkisində Demokratlar Partiyasından Hillari Klintonu məğlub edib. Seçicilər Kollegiyası 2016-cı il dekabrın 19-da prezident seçkisi ilə bağlı yekun qərarını verib, həmin səsvermənin nəticəsi Konqresin 2017-ci il yanvarın 6-da keçirilən iclasında təsdiqlənib, yanvarın 20-də Donald Tramp səlahiyyətlərinin icrasına başlayıb.
