Narkotiklərlə mübarizə: 4195 fakt aşkar olunub
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının işçi qrupu yeni hesabat yayıb. Rəsmi məlumata görə, 2020-ci ilin yanvar-sentyabr aylarında narkotiklərlə mübarizə sahəsində 4195 fakt aşkar olunub: “Onların 1507-si narkotik vasitələrin qanunsuz satışı, 2309-u narkotik vasitələrin qanunsuz əldə edilib saxlanması, 317-si narkotik xassəli bitkilərin qanunsuz kultivasiya edilməsi, 62-si digər cinayətlərlə bağlıdır.
Aşkar edilmiş faktlar üzrə qanunsuz dövriyyədən 3 ton 806 kiloqramdan çox narkotik vasitə və psixotrop maddə müsadirə olunub. 2513 hektar sahədə çəkisi 152 ton 791 kiloqramdan çox olan narkotik tərkibli bitkilər müəyyən olunaraq məhv edilib.
9 ay ərzində narkotiklərin qanunsuz dövriyyəsi ilə bağlı cinayətlərə görə 3105 nəfər cinayət məsuliyyətinə alınıb. Onların 4-ü 18 yaşadək, 251-i 25 yaşadək, 526-sı 29 yaşadək, 2308-i 30 yaş və daha yuxarı yaşda olan şəxslərdir. Məsuliyyətə cəlb olunanlar arasında 60 qadın, 61 əcnəbi var.
2019-cu ilin 9 ayı ilə müqayisədə narkotik vasitələrin və psixotrop maddələrin qanunsuz dövriyyəsi ilə bağlı faktların sayı 536, qanunsuz satışı ilə bağlı faktların sayı 437, narkotik xassəli bitkilərin qanunsuz kultivasiya edilməsi ilə bağlı faktların sayı 56, qrup şəklində törədilmiş cinayətlərin sayı 251 fakt, məsuliyyətə cəlb edilmiş şəxslərin sayı 487 nəfər artıb”.
Novator.az bildirir ki, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasına baş nazirin müavini Əli Əhmədov sədrlik edir. Daxili işlər naziri Vilayət Eyvazovun sədr müavini olduğu qurumda Prezident Administrasiyasının, Milli Məclisin, Nazirlər Kabinetinin, mərkəzi və yerli icra hakimiyyəti orqanlarının rəsmiləri və başqaları yer alır.
