Türk zəfəri
Avropa Futbol Assosiasiyaları Birliyinin (UEFA) Çempionlar Liqasında qrup mərhələsinin ilk dövrəsi bitib. Novator.az-ın məlumatına görə, H qrupunda yarışan Türkiyə təmsilçisi “Başakşəhər” noyabrın 4-ü İstanbulda “Mançester Yunayted”i (İngiltərə) yenib – 2:1.
“Leypsiq” (Almaniya) evdə PSJ-yə (Fransa) həmin hesabla üstün gəlib.
Üç turdan sonra ingilislərin və almanların 6, fransızlarla türklərin 3 xalı var.
Qrupda ilk iki yeri tutan komandalar növbəti raunda çıxacaq, üçüncü yerin sahibi Avropa Liqasına köç edəcək.
Əsası 1990-cı ildə qoyulmuş “Başakşəhər” Türkiyə milli çempionatının 2019-2020 mövsümünün qalibi olub. Bu, klubun ilk çempionluğu kimi tarixə düşüb.
Çempionlar Liqasının 2020-2021 mövsümündə mübarizəni davam etdirən 12 komandanın 1955-ci ildə yaradılmış, 1991-ci ilə qədər Çempionlar kuboku adlanmış turnirdə zəfəri var. “Real” 13, “Bavariya” və “Liverpul” 6, “Barselona” 5, “Ayaks” 4, “İnter” və “Mançester Yunayted” 3, “Yuventus” və “Portu” 2, “Marsel”, “Borussiya” (Dortmund) və “Çelsi” 1 titula sahibdir.
