Azərbaycan İnvestisiya Holdinqinin idarəetməsinə verilən qurumlar
Noyabrın 5-də fərman imzalayan prezident İlham Əliyev Azərbaycan İnvestisiya Holdinqinin (AİH) idarəetməsinə verilən dövlət şirkətlərinin və müəssisələrinin, habelə dövlət payı olan təsərrüfat cəmiyyətlərinin siyahısını təsdiqləyib. Həmin müəssisələrin idarə olunması ilə bağlı səlahiyyətlər (prezidentin müəyyən etdiyi hallar istisna olmaqla) AİH-yə keçir.
AİH-nin fəaliyyətinin təşkili və təmin edilməsi xərcləri bu mənbələrdən maliyyələşdirilir: ilk 3 il ərzində (nizamnamə fonduna ayrılmış vəsait nəzərə alınmaqla) dövlət büdcəsinin vəsaiti hesabına; idarəetməsinə verilmiş dövlət müəssisələrinin illik xalis mənfəətinin 20 faizinin AİH-yə ödənməsi hesabına; qanunla qadağan olunmayan digər mənbələrdən.
Azərbaycan İnvestisiya Holdinqinin idarəetməsinə verilən qurumlar bunlardır:
Azərbaycan Respublikasının Dövlət Neft Şirkəti
“Azərbaycan Hava Yolları” Qapalı Səhmdar Cəmiyyəti
“Azərbaycan Dəmir Yolları” Qapalı Səhmdar Cəmiyyəti
“Azərbaycan Xəzər Dəniz Gəmiçiliyi” Qapalı Səhmdar Cəmiyyəti
“Bakı Metropoliteni” Qapalı Səhmdar Cəmiyyəti
“AzerGold” Qapalı Səhmdar Cəmiyyəti
“Azərenerji” Açıq Səhmdar Cəmiyyəti
“Azərsu” Açıq Səhmdar Cəmiyyəti
“Azərişıq” Açıq Səhmdar Cəmiyyəti
Azərbaycan Meliorasiya və Su Təsərrüfatı Açıq Səhmdar Cəmiyyəti
“Azərkosmos” Açıq Səhmdar Cəmiyyəti
“Azərbaycan Beynəlxalq Bankı” Açıq Səhmdar Cəmiyyəti
“Azər-Türk Bank” Açıq Səhmdar Cəmiyyəti
“Azəristiliktəchizat” Açıq Səhmdar Cəmiyyəti
“Təmiz Şəhər” Açıq Səhmdar Cəmiyyəti
Nəqliyyat, Rabitə və Yüksək Texnologiyalar Nazirliyinin tabeliyindəki qurumlar:
“Bakı Beynəlxalq Dəniz Ticarət Limanı” Qapalı Səhmdar Cəmiyyəti
“Aztelekom” Məhdud Məsuliyyətli Cəmiyyəti
“Azerbaijan International Telecom” (AzInTelecom)” Məhdud Məsuliyyətli Cəmiyyəti
“Azərpoçt” Məhdud Məsuliyyətli Cəmiyyəti
“Bakı Telefon Rabitəsi” Məhdud Məsuliyyətli Cəmiyyəti
Azərbaycan Respublikasının Dövlət Sığorta Kommersiya Şirkəti.
Novator.az bildirir ki, Azərbaycan İnvestisiya Holdinqi prezidentin 7 avqust fərmanı ilə yaradılıb. Publik hüquqi şəxs olan Azərbaycan İnvestisiya Holdinqi onun idarəetməsinə verilmiş dövlət şirkətlərinin və müəssisələrinin, dövlət payı olan təsərrüfat cəmiyyətlərinin vahid prinsiplər əsasında idarə edilməsi, fəaliyyətinin təkmilləşdirilməsi, o cümlədən həyata keçirdikləri investisiya proqramlarının şəffaflığının və iqtisadi səmərəsinin yüksəldilməsi, onların rəqabət qabiliyyətinin təmin olunması, maliyyə sağlamlığının və dayanıqlılığının yaxşılaşdırılması sahəsində fəaliyyət göstərir.
Qurumun Müşahidə Şurasına baş nazir Əli Əsədov sədrlik edir. Mətin Eynullayev İdarə Heyətinin sədri, Ruslan Əlixanov baş icraçı direktordur.
Fərman: dövlətə bağlı qurumlar bir əldə cəmlənir
İnvestisiya Holdinqinin Müşahidə Şurası təsdiqləndi
