Neftsiz ixracın detalları
İqtisadi İslahatların Təhlili və Kommunikasiya Mərkəzi yeni ixrac icmalı yayıb. Rəsmi hesabata görə, 2020-ci ilin yanvar-sentyabr aylarında Azərbaycan 1,3 milyard ABŞ dolları dəyərində qeyri-neft məhsulu ixrac edib: “Rusiyaya 485,9 milyon dollar, Türkiyəyə 252 milyon dollar, İsveçrəyə 166,1 milyon dollar, Gürcüstana 99,6 milyon dollar, Çinə 33,4 milyon dollar dəyərində mal göndərilib. Ən çox ixrac olunan malların siyahısında pomidor 167,8 milyon dollarla birinci, sikkə kəsilməsində istifadə olunmayan, digər emal olunmamış formalarda qızıl 150 milyon dollarla ikinci, pambıq mahlıcı 82,7 milyon dollarla üçüncü yerdə qərarlaşıb.
Doqquz ay ərzində meyvə-tərəvəz ixracı 402 milyon dollar, plastmas və onlardan hazırlanan məmulatların ixracı 122,4 milyon dollar, pambıq lifi ixracı 83,9 milyon dollar, alüminium və ondan hazırlanan məmulatların ixracı 73,7 milyon dollar, kimya sənayesi məhsullarının ixracı 60,3 milyon dollar, qara metallar və onlardan hazırlanan məmulatların ixracı 38,2 milyon dollar, bitki və heyvan mənşəli piylər və yağların ixracı 17,3 milyon dollar, şəkər ixracı 12,4 milyon dollar, pambıq ipliyi ixracı 12 milyon dollar, spirtli və spirtsiz içkilərin ixracı 9 milyon dollar, çay ixracı 6,7 milyon dollar dəyərində rəsmiləşib”.
İqtisadi İslahatların Təhlili və Kommunikasiya Mərkəzi 2016-cı ildə yaradılıb. Nizamnaməsinə görə, mərkəzin əsas missiyası təhlil və tədqiqatlar aparmaqla iqtisadi islahatların həyata keçirilməsi üçün təkliflər, habelə orta və uzun müddətli dövr üçün proqnozlar hazırlamaq, dövlət orqanlarını və qurumlarını həmin proqnozlarla təmin etməkdir.
Qurumun icraçı direktoru postunu Vüsal Qasımlı tutur.
