Yeni xəbər anonsu
Prezident İlham Əliyev noyabrın 2-də türkiyəli siyasətçi, dövlət xadimi Binəli Yıldırımın rəhbərlik etdiyi nümayəndə heyəti ilə görüşüb.
1955-ci il təvəllüdlü Binəli Yıldırım hakim Ədalət və İnkişaf Partiyasının qurucularındandır. 2002-ci ildən bütün hökumətlərdə təmsil olunub, 2016-2018-ci illərdə baş nazir postunu tutub, 2018-2019-cu illərdə Türkiyə parlamentinə sədrlik edib.
AZƏRTAC xəbər verir ki, qonaqları salamlayan prezident İlham Əliyev deyib: “Çox sağ olun ki, gəlmisiniz. Biz bunu çox yüksək qiymətləndiririk. Bu, növbəti həmrəylik təzahürüdür. Əziz qardaşım, cənab prezident dediyi kimi, Türkiyə hər zaman Azərbaycanın yanındadır. Bu dönəmdə birliyimiz daha da möhkəmləndi.
Bildiyiniz kimi, indi Vətən müharibəsi gedir, yaxşı nəticələr var, bir çox şəhərlər, kəndlər işğalçılardan azad edilib. Demək olar ki, hər həftə Azərbaycan xalqına bu haqda məlumat verirəm. Bu gün də yeni kəndlərin işğaldan azad edilməsi xəbəri veriləcək. Artıq ilkin məlumatlar gəlib. İnşallah, sona qədər bu haqlı davamızı davam etdirəcəyik, işğalçıları torpaqlarımızdan qovacağıq.
Türkiyə ilk saatlardan bizim yanımızda olduğunu bəyan edib. Hörmətli prezident, əziz qardaşım çox açıq bəyanatlar verib ki, Türkiyə hər zaman Azərbaycanın yanındadır və Azərbaycan tək deyil. Bu, çox önəmli bəyanatlar idi və bizə əlavə mənəvi dəstəyin göstərilməsi bir daha Türkiyə-Azərbaycan birliyinin təzahürüdür”.
1988-ci ildə Ermənistan Azərbaycanın Dağlıq Qarabağ bölgəsini ələ keçirmək üçün təcavüzə başlayıb. 1991-ci ildən təcavüz şiddətlənərək hərbi işğala çevrilib. 1994-cü ildə atəşkəslə dayanan müharibədə Ermənistan Dağlıq Qarabağdakı Xankəndi şəhərini, Şuşa, Xocalı, Xocavənd rayonlarını, keçmiş Ağdərə rayonunu və Dağlıq Qarabağ ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) işğal edib.
Azərbaycan Ordusunun sentyabrın 27-dən apardığı hərbi əməliyyatlarda Cəbrayıl, Füzuli, Zəngilan, Qubadlı şəhərləri, 3 qəsəbə və 184 kənd azad olunub.
