Mehmanxana biznesi: 71,6 faiz geriləmə var
Dövlət Statistika Komitəsi mehmanxana və bu tipli müəssisələrin fəaliyyəti haqqında hesabat açıqlayıb. Novator.az bildirir ki, rəsmi statistikaya görə, 2020-ci ilin yanvar-sentyabr aylarında Azərbaycanın mehmanxanalarında keçirilmiş gecələmələrin sayı ötən ilin doqquz ayı ilə müqayisədə 69,8 faiz azalıb.
Gecələmələrin ümumi sayı 806 min göstərilir, onların 56 faizi Bakının, 10,7 faizi Qəbələnin, 6,1 faizi Qusarın, 4,9 faizi Qubanın, 3,6 faizi Naftalanın, 2,8 faizi Lənkəranın, 2,5 faizi Naxçıvan Muxtar Respublikasının, qalanları digər bölgələrin payına düşür.
Əcnəbilərin mehmanxanalarda keçirilmiş gecələmələrin sayında 78,8 faiz azalma olduğu vurğulanır.
Hesabata əsasən, yanvar-sentyabr aylarında mehmanxanaların gəlirləri əvvəlki ilin eyni dövrü ilə müqayisədə 71,6 faiz azalaraq 94,9 milyon manat olub.
