İtkilər və dağıntılar
Baş Prokurorluğun oktyabrın 26-sı saat 12-yə olan hesabatına görə, Ermənistan silahlı qüvvələrinin Azərbaycanın yaşayış məntəqələrini atəşə tutması nəticəsində sentyabrın 27-dən bəri 65 mülki şəxs həlak olub, 297 nəfər xəsarət alıb, 2243 yaşayış evi, 90 çoxmənzilli bina, 402 mülki obyekt dağılıb.
1988-ci ildə Ermənistan Azərbaycanın Dağlıq Qarabağ bölgəsini ələ keçirmək üçün təcavüzə başlayıb. 1991-ci ildən təcavüz şiddətlənərək hərbi işğala çevrilib. 1994-cü ildə atəşkəslə dayanan müharibədə ölkənin bütün cənub-qərbi Ermənistanın nəzarətinə keçib.
2020-ci il sentyabrın 27-dən Azərbaycan Ordusunun işğal bölgəsində keçirdiyi əməliyyatlarda Cəbrayıl, Füzuli, Zəngilan, Qubadlı şəhərləri, həmin rayonların, eləcə də Xocavənd rayonunun və keçmiş Ağdərə rayonunun bir çox kənd və qəsəbəsi, strateji yüksəkliklər, o cümlədən Kəlbəcər istiqamətində Murov yüksəkliyi azad olunub.
Hazırda düşmən Xankəndi şəhərini, Şuşa və Xocalı rayonlarını, Xocavənd və Ağdam rayonlarının və keçmiş Ağdərə rayonunun böyük hissəsini, Laçın və Kəlbəcər rayonlarını nəzarətdə saxlayır.
Ermənistan silahlı qüvvələri Tərtər, Goranboy, Bərdə, Yevlax, Ağcabədi, Beyləqan, Füzuli, Ağdam rayonlarını, Gəncə, Mingəçevir şəhərlərini və başqa əraziləri (Kürdəmir, Qəbələ, Abşeron, Xızı, Siyəzən) atəşə tutur.
