“Onlar Rusiyadan hərbçilər göndərməyi xahiş etdilər”
Prezident İlham Əliyev Amerika Birləşmiş Ştatlarının “Fox News” televiziya kanalına müsahibədə sentyabrın 27-dən Qarabağ cəbhəsində gedən döyüşlərin Azərbaycanın təşəbbüsü olmadığını vurğulayıb: “Sentyabrın 27-də döyüşlərə başlayan Azərbaycan olmayıb. Bu vaxta kimi heç bir ölkənin rəsmi nümayəndəsi bu məsələni bizim qarşımızda qaldırmayıb. Sentyabrın 27-də hücuma keçən Ermənistan olub və məqsəd danışıqlar prosesini tamamilə pozmaq idi. Onlar eyni hərəkəti iyul ayında da etmişdilər. O zaman onlar Ermənistan-Azərbaycan dövlət sərhədində bizim qüvvələrimizə hücum etdilər. Onlar acı məğlubiyyətlə üzləşdilər. Sonra onlar avqustda hərbi mövqelərimizə nüfuz etmək, mülki şəxslərimizə və hərbi qulluqçularımıza hücum etmək üçün diversiya qrupu göndərdilər.
Sentyabrın 27-də onlar ağır silahlarından artilleriya bombardmanına başladılar və hücumun ilk saatlarında bizdə mülki şəxslər və hərbi qulluqçular arasında qurbanlar olub. Bu vaxta kimi mülki şəxslər arasında 63 nəfər öldürülüb və demək olar ki, 300 nəfər mülki şəxs yaralanıb. Beləliklə, bu hücuma başlayan Ermənistan idi, biz özümüzü müdafiə etməli və cavab verməli idik. Bizim cavabımız çox adekvat olub və nəticədə biz işğal olunmuş ərazilərin mühüm hissəsini azad edə bildik”.
Dövlət başçısı diplomatik planda Dağlıq Qarabağa müstəqillik və ya muxtariyyət verilməsi təkliflərinin olmadığını deyib: “Vasitəçilər – Amerika Birləşmiş Ştatları, Rusiya və Fransa Dağlıq Qarabağa müstəqillik verilməsi ilə bağlı heç bir plan təqdim etməyib. Sülh planında təklif, bənd var ki, Dağlıq Qarabağın ətrafında yerləşən işğal olunmuş bütün ərazilərin, – bu o ərazilərdir ki, orada azərbaycanlılar yaşayıb və 700 mindən çox azərbaycanlı bu ərazilərdən etnik təmizləməyə məruz qalıb, – Azərbaycana qaytarılması deyilir. Bütün azərbaycanlılar Dağlıq Qarabağdan qovulub, müharibədən əvvəl orada 40 min azərbaycanlı var idi.
Biz müharibəyə başlamamışıq. Biz, sadəcə, cavab verdik və biz bunu Birləşmiş Millətlər Təşkilatının nizamnaməsi əsasında edirik. Birləşmiş Millətlər Təşkilatının nizamnaməsi hər bir ölkənin özünümüdafiə hüququnu təmin edir. Bizim etdiyimiz odur ki, biz özümüzü müdafiə edirik və biz Azərbaycanın beynəlxalq səviyyədə tanınan ərazilərini erməni işğalından azad edirik. Bundan artıq heç bir şey etmirik. Erməni xalqına gəldikdə, mən dəfələrlə demişəm ki, Dağlıq Qarabağda yaşayan ermənilər bizim vətəndaşlarımızdır, biz onların qeydinə qalacağıq. Onlar oraya qayıdacaq azərbaycanlılarla yanaşı, ləyaqət, sülh içində yaşayacaqlar”.
İlham Əliyev qeyd edib ki, Ermənistan Rusiyadan birbaşa hərbi iştirakı xahiş etməyə son qoymalıdır: “Bu, səmərəsizdir. Bütün bu vaxt ərzində Ermənistan baş nazirinin bütün cəhdləri Rusiyadan Azərbaycana qarşı döyüşmək üçün qoşun göndərməyi xahiş etmək olub. Bu, çox təhlükəlidir.
Münaqişə ərzində bizim bütün səylərimiz aktiv fazaya mümkün qədər tez son qoymaq məqsədi daşıyıb. Biz münaqişə genişlənsin deyə münaqişənin hər hansı formada beynəlmiləlləşdirilməsinin tamamilə əleyhinəyik. Ermənistanın etmək istədiyi məhz budur. Onlar Rusiyadan münaqişə bölgəsinə hərbçilər göndərməyi xahiş etdilər. Bu, tamamilə səmərəsiz və beynəlxalq hüquqa ziddir. Biz başqa ölkələrin müdaxilə etməsini istəmirik”.
