Yeni seçki sorğusu
ABŞ-ın “Real Clear Politics” təşkilatı noyabrın 3-nə təyin olunmuş prezident seçkisi ilə sorğularını davam etdirir.
Seçkinin əsas namizədləri Respublikaçılar Partiyasından prezident Donald Tramp və Demokratlar Partiyasından sabiq vitse-prezident Cozef Baydendir.
50 ştat və 1 federal dairədən ibarət ABŞ-da prezidenti seçki günü müəyyənləşən xüsusi nümayəndələrdən ibarət Seçicilər Kollegiyası seçir. Prezident seçilmək üçün 538 nümayəndədən 270-nin səsini qazanmaq lazımdır.
Ümumxalq səsverməsindən sonra Seçicilər Kollegiyası yekun qərar verir və həmin qərar Konqresin iclasında təsdiqlənir.
Novator.az bildirir ki, “Real Clear Politics”in son sorğusuna əsasən, Cozef Baydenin Seçicilər Kollegiyasına 232 nümayəndə, Donald Trampın 125 nümayəndə keçirmək imkanı var.
Ümumilikdə 181 nümayəndəsi olan ştatlarda seçicilər iki namizəd arasında tərəddüd edir.
Donald Tramp 1946-cı ildə doğulub. 1999-cu ildə Respublikaçılar Partiyasına qoşulub.
2016-cı il noyabrın 8-də keçirilmiş prezident seçkisində Respublikaçılar Partiyasının namizədi olmuş Donald Tramp Demokratlar Partiyasından Hillari Klintonu məğlub edib. Seçicilər Kollegiyası 2016-cı il dekabrın 19-da prezident seçkisi ilə bağlı yekun qərarını verib, həmin qərar Konqresin 2017-ci il yanvarın 6-da keçirilən iclasında təsdiqlənib, yanvarın 20-də Donald Tramp səlahiyyətlərinin icrasına başlayıb.
Cozef Bayden 1942-ci ildə doğulub. 1972, 1978, 1984, 1990, 1996, 2002 və 2008-ci illərdə ABŞ Konqresinin yuxarı palatası olan Senatın üzvü seçilib.
1987-1995-ci illərdə Senatın Məhkəmə Komitəsinə, 2001-2003 və 2007-2009-cu illərdə Xarici Əlaqələr Komitəsinə sədrlik edib.
2009-2017-ci illərdə – Barak Obamanın prezidentliyi dövründə vitse-prezident postunu tutub.
