Şans var. Necə?
UEFA Millətlər Liqasının qrup mərhələsində dörd tur arxada qalıb. C divizionunun 1-ci qrupunda yer alan Azərbaycan milli komandası hələlik 4 xal toplayıb. Lüksemburq və Monteneqronun 9, Kiprin 1 xalı var.
Qalan oyunların təqvimi belədir:
14 noyabr
Azərbaycan – Monteneqro
Kipr – Lüksemburq
17 noyabr
Lüksemburq – Azərbaycan
Monteneqro – Kipr.
C divizionu qruplarının qalibləri B divizionuna adlayacaq, divizionun ən zəif iki komandası isə D divizionuna düşəcək.
Futbol icmalçısı Rasim Mövsümzadə Novator.az-a açıqlamasında Azərbaycan yığmasının qrupda birinci yeri tutmaq şansını dəyərləndirib. O deyib ki, millinin nəzəri cəhətdən qrupda birinci yeri tutmaq şansı var: “Bunun üçün Azərbaycan komandası qalan iki oyunun hər birində qalib gəlməlidir. Bu halda millimizin yarışda topladığı xalların sayı 10-a yüksələcək.
Həmçinin birinci yer uğrunda rəqiblərimiz olan Lüksemburq və Monteneqro da noyabrda Kipr komandasına qalib gəlməməlidirlər. Rəqiblərimiz Kiprə də məğlub olsalar, o zaman Azərbaycanın 10, Lüksemburq və Monteneqronun 9 xalı olacaq və biz birinci yeri tutacağıq.
Əgər rəqiblərdən biri və ya hər ikisi Kiprlə heç-heçə etsə, onda iki və ya üç komandanın 10 xalı olacaq, sonda onların öz aralarındakı oyunların nəticələrinə və top fərqinə baxılacaq. Bunun üçün Azərbaycan komandası qalan oyunlarda azı 2-3 top fərqi ilə qələbə qazanmalıdır”.
