Oktyabrın 15-nə keçən gecə cəbhənin Ağdərə-Ağdam və Füzuli-Hadrut-Cəbrayıl istiqamətlərində vəziyyət gərgin olub. Xəbəri yayan Müdafiə Nazirliyi bildirir ki, Ermənistan silahlı qüvvələrinin bölmələri gecə ərzində cəbhənin bəzi istiqamətlərində Azərbaycan Ordusunun mövqelərinə basqın cəhdi göstərib, ciddi itki verərək geri çəkilməyə məcbur edilib.

Düşmənin xeyli canlı qüvvəsinin, hərbi texnikasının məhv edildiyi vurğulanır: “Ermənistan silahlı qüvvələrinin işğal etdiyi ərazilərdəki qüvvə və ehtiyatlarına ağır zərbə vurulub. Canlı qüvvə, döyüş texnikası, silah-sursat, yanacaq tükənmək üzrədir”.

Başqa bir məlumata görə, Ermənistan silahlı qüvvələri oktyabrın 15-i səhərdən Goranboy, Tərtər, Ağdam və Ağcabədi rayonlarının ərazilərini atəşə tutur.

1988-ci ildən Azərbaycanın Dağlıq Qarabağ vilayətini ələ keçirmək üçün təcavüzə başlayan Ermənistan həmin bölgəni (Xankəndi şəhəri, Şuşa, Xocalı, Xocavənd rayonları, keçmiş Ağdərə rayonu) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) işğal edib.

2020-ci il sentyabrın 27-dən Azərbaycan Ordusu işğal bölgəsində əməliyyatlar keçirib, Cəbrayıl şəhəri və həmin rayonun bir çox kəndi, Füzuli, Xocavənd rayonlarının və keçmiş Ağdərə rayonunun bəzi məntəqələri, strateji yüksəkliklər, o cümlədən Kəlbəcər istiqamətində Murov yüksəkliyi azad olunub.

Oktyabrın 10-da həlak olanların meyitlərini və əsirləri dəyişdirmək üçün atəşkəs rejimi qüvvəyə minib, ancaq Ermənistan buna məhəl qoymur.