Sənaye, sərmayə və xarici ticarət hesabatları
2020-ci ilin yanvar-sentyabr aylarında Azərbaycanda 27,8 milyard manatlıq və ya 2019-cu ilin eyni dövrü ilə müqayisədə 4,5 faiz az sənaye məhsulu istehsal olunub. Novator.az-ın məlumatına görə, hesabatı yayan Dövlət Statistika Komitəsi bildirir ki, neft-qaz sektorunda məhsul istehsalı 6,1 faiz azalıb, sənayenin qeyri neft-qaz sektorunda isə məhsul istehsalı 10,8 faiz artıb.
Başqa bir hesabatda qeyd olunur ki, doqquz ayda əsas kapitala 10 milyard 430,2 milyon manat məbləğində, yaxud 2019-cu ilin yanvar-sentyabr ayları ilə müqayisədə 3,8 faiz az vəsait yönəldilib. Neft-qaz sektoruna yatırılmış investisiyaların həcminin 15,2 faiz artdığı, qeyri neft-qaz sektoruna yönəldilən vəsaitin həcminin 14,1 faiz azaldığı vurğulanır.
Xarici ticarət əlaqələri haqqında hesabata əsasən, yanvar-avqust aylarında 175 ölkə ilə ticarət əməliyyatları həyata keçirilib, 105 ölkəyə məhsul ixrac olunub, 162 ölkədən məhsul alınıb: “2019-cu ilin yanvar-avqust ayları ilə müqayisədə xarici ticarət dövriyyəsi faktiki qiymətlərlə 29,8 faiz, real ifadədə 22,9 faiz, o cümlədən idxal 42,2 faiz, ixrac 8,9 faiz azalıb. Qeyri neft-qaz məhsullarının ixracı əvvəlki ilin eyni dövrü ilə müqayisədə faktiki qiymətlərlə 9,7 faiz, real ifadədə 18,4 faiz azalaraq 1 milyard 153,2 milyon dollar təşkil edib”.
