Ermənistandan Mingəçevirə buraxılan raketlər zərərsizləşdirilib

11 Oktyabr 2020
comments
Novator.az
Posted in Manşet Xəbər

Ermənistan silahlı qüvvələri oktyabrın 11-i gecə saat 4 radələrində Azərbaycanın Mingəçevir şəhərinə raketlər buraxıb.

Baş Prokurorluğun açıqlamasına görə, düşmən raketləri atarkən Mingəçevirdəki İstilik Elektrik Stansiyasını hədəfə alıb.

Azərbaycan Ordusunun Hava Hücumundan Müdafiə Qüvvələri raketləri zərərsizləşdirib.

Mingəçevir iri sənaye şəhəri, buradakı İstilik Elektrik Stansiyası Cənubi Qafqazın ən böyük istilik elektrik stansiyasıdır.

Mingəçevir cəbhə zonasından 100 kilometrdən artıq uzaqlıqda yerləşir.

Mingəçevirə raket buraxmazdan iki saat qabaq düşmən cəbhə bölgəsindən uzaqda yerləşən daha bir şəhəri – Gəncəni hədəfə alıb. Gəncənin mərkəzində yerləşən çoxmənzilli yaşayış binaları raketlə vurulub. 9 nəfər həlak olub, 34 nəfər yaralanıb, 10-dan artıq çoxmənzilli binaya və 100-dən çox müxtəlif təyinatlı obyektə ziyan dəyib.

1988-ci ildə Azərbaycanın Dağlıq Qarabağ Muxtar Vilayətində bölgənin Ermənistana verilməsi tələbi ilə separatçı hərəkat başlayıb. 1991-ci ildə Dağlıq Qarabağ erməniləri bölgəni “müstəqil dövlət” elan edib, Azərbaycan torpaqlarının işğalına başlanıb. 1994-cü ildə atəşkəslə dayanan müharibədə Dağlıq Qarabağ bölgəsi (Xankəndi şəhəri, Şuşa, Xocalı, Xocavənd rayonları, keçmiş Ağdərə rayonu) və onun ətrafındakı bölgələr (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) tutulub.

2020-ci il sentyabrın 27-dən Azərbaycan Ordusu işğal bölgəsində əməliyyat keçirib, Cəbrayıl şəhəri və həmin rayonun bir çox kəndi, Füzuli, Xocavənd rayonlarının və keçmiş Ağdərə rayonunun bəzi məntəqələri, strateji yüksəkliklər, o cümlədən Kəlbəcər istiqamətində Murov yüksəkliyi azad olunub.

Oktyabrın 9-da Rusiyanın xarici işlər naziri Sergey Lavrovun vasitəçiliyi ilə Azərbaycan və Ermənistanın xarici işlər nazirləri Ceyhun Bayramovla Zöhrab Mnasakanyan Moskvada bir araya gəliblər. 11 saata yaxın çəkən, oktyabrın 10-na keçən gecə başa çatan görüşdə atəşkəs razılığı əldə olunub. Razılığa görə, 10 oktyabr saat 12:00-dan atəşkəs rejimi başlanmalı, hərbi əsirlər, digər saxlanan şəxslər, ölənlərin meyitləri dəyişdirilməli, həmçinin Azərbaycanla Ermənistan ATƏT-in Minsk qrupu həmsədrlərinin vasitəçiliyi ilə və tənzimlənmənin əsas prinsipləri əsasında münaqişənin tezliklə dinc həlli üçün substantiv danışıqlara başlamalıdır.

Moskva razılaşmasına baxmayaraq, Ermənistan silahlı qüvvələri Azərbaycana hücumlarını davam etdirir, cəbhə bölgəsində itirdiyi mövqeləri geri qaytarmağa cəhd göstərir, eyni zamanda yaşayış məntəqələrini atəşə tutur. Oktyabrın 10-u və 11-nə keçən gecə düşmən Mingəçevir və Gəncə ilə yanaşı Tərtər şəhərini və Ağdam rayonunun ərazisini də atəşə tutub.

Sentyabrın 27-dən bəri düşmən Tərtər, Goranboy, Naftalan, Ağdam, Bərdə, Yevlax, Ağcabədi, Beyləqan, Füzuli, Gəncə, Mingəçevirdə dinc əhalini dəfələrlə raket və artilleriya atəşinə tutub. Cəbhə bölgəsindən çox uzaqda yerləşən Abşeron və Xızı rayonlarına da raket atılıb.

Cəbhədə gərginlik

Şiddətli döyüşlər gedir

Prezidentin xalqa müraciəti

Təhlükəsizlik Şurası toplanıb

Hərbi vəziyyət elan edilir

Komendant saatı gəlir

Komendant təyinatı, qismən səfərbərlik

Komendant saatında hərəkət: rəsmi qərar verildi

Füzuli döyüşləri, sərhəddə atəş

BMT baş katibinə deyilənlər

“Azərbaycan onlara yerini göstərəcək”

Merkellə telefon söhbəti