Müdafiə Nazirliyinin məlumatına görə, oktyabrın 8-i günün ikinci yarısından 9-u səhərədək bütün cəbhə boyu gərgin döyüşlər davam edib: “Azərbaycan Ordusunun bölmələri mühüm istiqamətlərdə düşmənə atəş zərbələri endirərək onun hərəkət fəaliyyətini tam məhdudlaşdırıb və aktivliyinin qarşısını qətiyyətlə alıb. Görülən tədbirlər nəticəsində düşmən qoşunları arasında idarəetmə və qarşılıqlı əlaqə itib, bölmələri arasında nizamsızlıq yaranıb, şəxsi heyətinin intizamı pozulub, döyüş mövqelərinin tərk edilməsi kütləvi hal alıb”.

Rəsmi açıqlamaya əsasən, Azərbaycan Ordusunun atəş zərbəsi nəticəsində Ermənistan silahlı qüvvələrinin bir alayının qərargah binası dağıdılıb, diviziya qərargahının rəisi polkovnik Samvel Qriqoryan ağır yaralanıb, alayın artilleriya rəisi polkovnik-leytenant Arman Dermeyan və xeyli sayda hərbi qulluqçu məhv edilib: “Azərbaycan Ordusunun Xankəndi şəhərinə endirdiyi atəş zərbələrindən ağır itkilərə məruz qalan hərbi hissələrin şəxsi heyəti təxliyə edilir. Xankəndidə yerləşən hərbi hissələrdən birinin sığınacağına endirilən artilleriya atəşi nəticəsində xeyli sayda hərbi qulluqçu məhv edilib və yaralanıb”.

Məlumatda həmçinin qeyd olunur ki, ötən gün və oktyabrın 9-na keçən gecə düşmənin xeyli hərbi texnikası dəqiq atəşlə məhv edilib və sıradan çıxarılıb, 6 ədəd T-72 tankı tam işlək vəziyyətdə ələ keçirilib.