Uyğunluq sertifikatının yeni qaydaları
Nazirlər Kabineti uyğunluq sertifikatının forması, uyğunluq nişanından istifadə və verilməsi qaydalarını təsdiqləyib. Novator.az bildirir ki, qaydalara görə, sertifikatın iki forması tərtib edilir: malların (işlərin, xidmətlərin) uyğunluğunun könüllü qiymətləndirilməsi barədə sertifikat; mal (iş, xidmət) ilə əlaqəli prosesin (o cümlədən idarəetmə sisteminin) və istehsal metodunun uyğunluğunun könüllü qiymətləndirilməsi barədə sertifikat.
Uyğunluq sertifikatlarında bu məlumatlar göstərilir: sertifikatın adı; sertifikatı verən qurumun adı və akkreditasiya attestatının qeydiyyat nömrəsi; blankın qeydiyyat nömrəsi; sertifikatın verilmə tarixi; sertifikatın qeydiyyat nömrəsi; sertifikat verilən hüquqi şəxsin adı və hüquqi ünvanı, fiziki şəxsin adı, soyadı, atasının adı və ünvanı; standartlaşdırma üzrə normativ sənədlərin adı, nömrəsi və tarixi; sertifikatın verilmə əsası; əlavə məlumat (olduqda); uyğunluğu qiymətləndirən qurumun rəhbərinin (səlahiyyətli nümayəndəsinin), uyğunluğu qiymətləndirən səlahiyyətli şəxsin imzası, adı, soyadı və atasının adı; möhür yeri (olduqda).
Malların (işlərin, xidmətlərin) uyğunluğunun könüllü qiymətləndirilməsi barədə uyğunluq sertifikatında uyğunluğu qiymətləndirilmiş malın (işin, xidmətin) adı, növü, markası, xarici iqtisadi fəaliyyətin mal nomenklaturası, məhsul növləri təsnifatı üzrə kodu, məhsulun istehsal edildiyi, işin və xidmətin göstərildiyi yerin ünvanı, mal (iş, xidmət) ilə əlaqəli prosesin (o cümlədən idarəetmə sisteminin), istehsal metodunun uyğunluğunun könüllü qiymətləndirilməsi barədə uyğunluq sertifikatında isə idarəetmə sistemlərinin və istehsal metodlarının sertifikatlaşdırıldığı müəssisənin tam adı, mal (iş, xidmət) ilə əlaqəli prosesin (o cümlədən idarəetmə sisteminin) tətbiq edildiyi fəaliyyət sahəsi göstərilir.
Uyğunluq sertifikatı dövlət dilində tərtib edilir. Dövlət dilində tərtib edilmiş uyğunluq sertifikatı digər dillərə tərcümə edildikdə tərcümənin düzgünlüyü notariat qaydasında təsdiqlənməlidir.
Uyğunluq sertifikatı tam şəkildə doldurulmalı və çap üsulu ilə təsvir edilməlidir. Üzərində düzəlişlər edilmiş və yaxud zədələnmiş sertifikatlar etibarsızdır.
