Gözəl Bayramlı vəfat edib
Xalq Cəbhəsi Partiyası sədrinin müavini Gözəl Bayramlı vəfat edib.
Novator.az xəbər verir ki, milli azadlıq hərəkatının fəallarından olan Gözəl Bayramlı bir müddət AXCP-nin ümumi şöbəsinin müdiri işləyib. 2010-cu ildən AXCP sədrinin müavini, Ali Məclisin Rəyasət Heyətinin üzvü olub.
Gözəl Bayramlı 2011-ci il aprelin 17-də İctimai Palatanın paytaxtda keçirdiyi aksiyaya görə 5 sutka inzibati həbs cəzasına məhkum edilib.
2017-ci il mayın 25-də o, yenidən tutulub. Gürcüstandan Azərbaycana gələrkən Qazax rayonunda həbs olunan Gözəl Bayramlı qaçaqmalçılıqda təqsirli bilinərək Qazax Rayon Məhkəməsinin hökmü ilə 3 il müddətinə azadlıqdan məhrum edilib. 2018-ci il noyabrın 14-də Ali Məhkəmə qaçaqmalçılıq ittihamını qaçaqmalçılığa cəhd ittihamı ilə əvəz edərək cəza müddətini iki ay azaldıb. Gözəl Bayramlı 2019-cu il martın 16-da dövlət başçısının imzaladığı əfv sərəncamı ilə azadlığa çıxıb.
İstər 2011-ci, istərsə də 2017-ci ildəki həbsləri Gözəl Bayramlı siyasi sifariş kimi qiymətləndirib, rəsmi ittihamları qəbul etməyib.
Gözəl Bayramlı uzun surən xəstəlikdən vəfat edib. Onun 58 yaşı var idi.
Allah rəhmət eləsin!
