Cəbhədə yeni qələbələr
Oktyabrın 3-də prezident, ali baş komandan İlham Əliyev özünün rəsmi “Tvitter” səhifəsində yeni məlumat yayıb. O bildirib ki, Azərbaycan Ordusu keçmiş Ağdərə rayonunun Talış kəndini, Cəbrayıl rayonunun Mehdili, Çaxırlı, Aşağı Maralyan, Şəybəy və Quycaq kəndlərini, Füzuli rayonunun Aşağı Əbdürrəhmanlı kəndini azad edib.
Dövlət başçısı məlumatı bu sözlərlə bitirib: “Qarabağ Azərbaycandır!”
1988-ci ildə Azərbaycana qarşı təcavüzə başlayan Ermənistan Dağlıq Qarabağ bölgəsini (Xankəndi şəhəri, Şuşa, Xocalı, Xocavənd rayonları, keçmiş Ağdərə rayonu) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) işğalda saxlayır.
Sentyabrın 27-də Ermənistan silahlı qüvvələri Tərtər, Ağdam, Füzuli, Cəbrayıl rayonları istiqamətində Azərbaycan Ordusunun mövqelərini və yaşayış məntəqələrini intensiv atəşə tutub. Həmin gündən Azərbaycan Ordusu əks-hücum əməliyyatı keçirir. Füzuli, Cəbrayıl, Kəlbəcər və Ağdərə bölgələrində bəzi ərazilər, o cümlədən Füzulinin Qaraxanbəyli, Qərvənd, Kənd Horadiz, Yuxarı Əbdürrəhmanlı, Cəbrayılın Böyük Mərcanlı və Nüzgar kəndləri azad edilib.
Keçmiş Ağdərə rayonu istiqamətində irəliləyən Azərbaycan Ordusu oktyabrın 3-də Madagiz kəndində Azərbaycan bayrağını qaldırıb. Dövlət başçısı İlham Əliyev həmin gün “Tvitter” səhifəsində açıqlama yayaraq bildirib ki, Madagizin tarixi adını bərpa edir, kənd Suqovuşan adlandırılır.
