Manatın xərci 5,6 milyard dolları keçib
Dövlət Neft Fondu Mərkəzi Bankın 2020-ci ilin yanvar-sentyabr aylarında manatı qorumaq üçün keçirdiyi valyuta hərraclarında 5 milyard 610,1 milyon dollar məbləğində vəsait satıb. Novator.az bildirir ki, yanvarın hərraclarında fond 300,2 milyon dollar, fevralın hərraclarında 543,4 milyon dollar, martın hərraclarında 1 milyard 928,3 milyon dollar, aprelin hərraclarında 531,1 milyon dollar, mayın hərraclarında 334 milyon dollar, iyunun hərraclarında 373,2 milyon dollar, iyulun hərraclarında 515,5 milyon dollar, avqustun hərraclarında 478 milyon dollar, sentyabrın hərraclarında 606,4 milyon dollar sərf edib.
2016-cı ildə Dövlət Neft Fondunun analoji xərci 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar, 2019-cu ildə 6,6 milyard dollar göstərilib.
2015-ci ilin iki devalvasiyası nəticəsində dolların məzənnəsi 0,7844 manatdan 1,5594 manata yüksəlib.
2016-cı ildə rəsmi qiymət 1,7707 manata çatıb.
2017-ci ilin fevralında maksimal qiymət qeydə alınıb: 1,92 manat. Həmin ili 1,7001 manatla yola salan dollar 2018-ci il martın 7-dən banklara 1,7 manata təklif edilir.
2020-ci ildə maksimal rəsmi kurs avroda 2,0284 manat, Gürcüstan larisində 0,6122 manat, Rusiya rublunda 0,0278 manat, Türkiyə lirəsində 0,2895 manat olub.
