Azərbaycan Dövlət Nəşriyyatı (“Azərnəşr”) Azərbaycan Ordusunun uğurlu əməliyyatına dəstək olaraq Silahlı Qüvvələrə Yardım Fonduna daxili imkanı hesabına 10 min manat vəsait köçürüb.

Məlumatı “Azərnəşr”in baş direktoru Əlövsət Ağalarov yayıb.

O, bütün imkanı olan təşkilatları bu təşəbbüsə qoşulmağa çağırıb.

Azərbaycanın Dağlıq Qarabağ bölgəsi (Xankəndi şəhəri, Şuşa, Xocalı, Xocavənd rayonları, keçmiş Ağdərə rayonu) və onun ətrafındakı bölgələr (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) Ermənistanın işğalı altındadır.

2020-ci il sentyabrın 27-si səhər Ermənistan silahlı qüvvələri Tərtər, Ağdam, Füzuli, Cəbrayıl rayonları istiqamətində Azərbaycan Ordusunun mövqelərini və yaşayış məntəqələrini iriçaplı silahlar, minaatanlar və müxtəlif çaplı artilleriya qurğularından intensiv atəşə tutub. Azərbaycan Ordusunun əks-hücumu ilə Füzuli, Cəbrayıl, Kəlbəcər və Ağdərə bölgələrində bəzi ərazilər azad edilib. Hazırda döyüşlər davam edir.

2002-ci ildə yaradılmış Silahlı Qüvvələrə Yardım Fondunun əsas maliyyə mənbəyi hüquqi və fiziki şəxslərdən könüllülük əsasında daxil olan vəsaitdir.

Qurumun dollar, avro və rubl hesabları da var.