Varşava yolunda
UEFA Çempionlar Liqasında və Avropa Liqasında dörd təsnifat mərhələsi arxada qalıb. Novator.az bildirir ki, 2020-2021 mövsümünə buraxılmış 237 komandadan 136-sı ilkin, birinci, ikinci və üçüncü raundlarda ələnib. Mübarizəni Çempionlar Liqasında 38, Avropa Liqasında 63 komanda davam etdirir.
55 UEFA üzvünün 19-u, o cümlədən Qazaxıstan, Litva, Latviya, Gürcüstan, Moldova təmsilçisizdir.
Azərbaycanın yeganə nümayəndəsi “Qarabağ” Avropa Liqasının dördüncü raundunda yer alır. Onun rəqibi Polşa “Legiya”sıdır. Oyun oktyabrın 1-i Varşavada keçiriləcək.
1916-cı ildə yaradılmış “Legiya” 14 dəfə Polşa çempionu olub, 19 dəfə ölkə kubokuna sahib çıxıb.
1970-ci ildə Çempionlar kubokunun (indiki Çempionlar Liqasının) yarımfinalında, 1991-ci ildə Kuboklar kubokunun yarımfinalında oynayıb.
“Qarabağ” mövsümə Çempionlar Liqasından başlayıb, birinci mərhələdə Şimali Makedoniyanın “Sileks” komandasını (4:0), ikinci mərhələdə Moldovanın “Şerif” klubunu (2:1) ələyib, üçüncü mərhələdə Norveç “Molde”sinə uduzub (oyunun əsas və əlavə vaxtlarında hesab açılmayıb, penalti seriyasında rəqib üstün gəlib – 6:5).
