35 ölkə “Avroviziya”ya hə deyib
İndiyədək 35 ölkə gələn ilin “Avroviziya” mahnı müsabiqəsində iştirakını təsdiqləyib.
1956-cı ildən keçirilən “Avroviziya” müsabiqəsi ictimai teleradioları cəmləşdirən Avropa Yayım Birliyinin layihəsidir. 2020-ci ildə Niderlandın Rotterdam şəhərində keçirilməli olan 65-ci yarışma koronavirus pandemiyası üzündən baş tutmayıb, Avropa Yayım Birliyi müsabiqənin 2021-ci il mayın 18-dən 22-dək eyni məkanda təşkilinə qərar verib.
Azərbaycanı müsabiqədə Samirə Əfəndi təmsil edəcək. O, 2020-ci il yarışması üçün seçilmişdi.
Daha 18 ölkə “Avroviziya 2021”ə 2020-ci il müsabiqəsi üçün seçilmiş təmsilçilərlə qatılacaq. Avstraliyadan yarışa Cessika Alissa Serro, Avstriyadan Vinsent Bueno, Belçikadan “Huverfonik” qrupu, Bolqarıstandan Viktoriya Georgiyeva, Çexiyadan Ben Kristovao, Gürcüstandan Tornike Kipiani, İspaniyadan Blas Kanto Moreno, İsraildən Eden Alene, İsveçrədən Con Muharremay, Latviyadan Samanta Tina, Maltadan Destini Çukunyere, Moldovadan Natalya Qordiyenko, Niderlanddan Janqyu Makroy, Rumıniyadan Larisa Roxana, San Marinodan Senhit Zadik Zadik, Sloveniyadan Ana Sokliç, Ukraynadan “Go A” qrupu, Yunanıstandan Stefaniya Liberakakis buraxılır.
2021-ci il müsabiqəsinə Albaniya, Almaniya, Danimarka, Ermənistan, Estoniya, Finlandiya, Fransa, Xorvatiya, İrlandiya, İslandiya, İsveç, Kipr, Litva, Norveç, Serbiya və Şimali Makedoniyanın qatılacağı da dəqiqləşib.
