Tanışlıq
Sentyabrın 22-də prezident İlham Əliyev və birinci vitse-prezident Mehriban Əliyeva İcbari Tibbi Sığorta üzrə Dövlət Agentliyinin ölkəyə yeni gətirdiyi təcili tibbi yardım avtomobilləri ilə tanış olublar.
Xəbəri AZƏRTAC yayıb.
Arayışa görə, yeni gətirilən avtomobillər həm sadə, həm də reanimobil kimi dəstləşdirilib: “Ambulansların salonlarının təchizat səviyyəsi xəstələrə bütün lazımi ilkin, təcili və təxirəsalınmaz tibbi yardımın göstərilməsinə və reanimasiya tədbirlərinin icra olunmasına imkan verir.
“Mercedes Sprinter 416” bazasında təcili tibbi yardım avtomobilləri (reanimobil) avadanlıq və burada göstərilən tibbi yardımın genişliyi baxımından digər ambulanslardan fərqlənir. Avtomobillər bir neçə xərəklə – əsas xərək, çoxfunksiyalı xərək (pilləsiz), scoop xərək, onurğa xərəyi, vakuum xərəyi və pompa, daşıma çadırı, üfürülən, dartma və vakuum şina dəstləri, defibrilyator, portativ süni tənəffüs aparatı, inqolyator, elektrokardioqram, reanimasiya çantası və başqa vasitələrlə təchiz edilib.
“Ford Transit” bazasında təcili tibbi yardım avtomobillərində isə ana xərək və döşək, sovurma avadanlığı, oksigen balonu və başqa avadanlıqlar var”.
