Son günlər “Pikap” tipli avtomobillər Yol-Patrul Xidməti (YPX) postlarında saxlanır. Sentyabrın 22-də Daxili İşlər Nazirliyinin Baş Dövlət Yol Polisi İdarəsi bunun səbəbinə aydınlıq gətirib.
Novator.az-ın məlumatına görə, Baş Dövlət Yol Polisi İdarəsi bəyan edib ki, “Hərbi nəqliyyat vasitələrinin uçot qaydaları”na əsasən (bu qaydaları Nazirlər Kabineti 2006-cı il aprelin 4-də təsdiqləyib) silahlı birləşmələrə və xüsusi birləşmələrə vaxtında, keyfiyyətli və tam həcmdə təqdim edilməsi məqsədilə hərbi nəqliyyat vasitələrinin texniki vəziyyəti plan üzrə yoxlanır.
Yoxlamanı Daxili İşlər Nazirliyinin Dövlət Yol Polisi və nəqliyyat vasitələrinin dövlət qeydiyyatını aparan digər təşkilatlar birlikdə aparır.
Baş Dövlət Yol Polisi İdarəsi bildirir ki, “Pikap” tipli və texniki imkanları onlara uyğun olan digər xüsusi təyinatlı nəqliyyat vasitələri Nazirlər Kabinetinin 2006-cı il fevralın 16-da təsdiqlədiyi siyahıda göstərilən yüksək keçidli avtomobillər kateqoriyasına aiddir: “Buna görə də həmin nəqliyyat vasitələrində yolsuzluq şəraitində istismar sistemlərinin texniki müayinəsi, nəqliyyat vasitələrinin uçot-qeydiyyat göstəricilərinin dəqiqləşdirilməsi və istifadə olunduqları ərazinin (şəhər, qəsəbə, kənd) müəyyən edilməsi məqsədilə stasionar postlarda saxlanır və bu haqda sahiblərinə məlumat verilir”.
