Bayden öndə görünür
Noyabrın 3-ü ABŞ-da prezident seçkisi keçiriləcək. Əsas namizədlər Respublikaçılar Partiyasından indiki dövlət başçısı Donald Tramp və Demokratlar Partiyasından sabiq vitse-prezident Cozef Baydendir.
Novator.az-ın məlumatına görə, Böyük Britaniyanın “Faynenşl Tayms” qəzeti ABŞ-ın “Real Clear Politics” təşkilatının apardığı sorğuya istinadla yazır ki, hazırda amerikalıların 50,1%-i prezident seçkisində Cozef Baydenə, 43%-i Donald Trampa səs vermək niyyətindədir.
Prezidenti ştatların seçki günü müəyyənləşdirdiyi xüsusi nümayəndələrdən ibarət Seçicilər Kollegiyası seçir. Prezident seçilmək üçün 538 nümayəndədən 270-nin səsini qazanmaq lazımdır.
“Real Clear Politics”in sorğusuna əsasən, prezident seçkisi indi keçirilsə, Cozef Bayden Seçicilər Kollegiyasına 270 nümayəndə qazanar. Ümumilikdə 203 nümayəndəsi olan ştatlarda Cozef Bayden aşkar üstün, üst-üstə 67 nümayəndəsi olan ştatlarda qələbəyə yaxın göstərilir.
Sorğuya əsasən, Donald Trampın Seçicilər Kollegiyasına 131 nümayəndə keçirmək imkanı var. O, üst-üstə 77 nümayəndəsi olan ştatlarda liderdir, ümumilikdə 54 nümayəndəsi olan ştatlarda şanslıdır.
Ümumilikdə 137 nümayəndəsi olan ştatlarda seçicilər iki namizəd arasında tərəddüd edir.
18-ci əsrin 70-ci illərində yaradılan ABŞ 50 ştat və 1 federal dairədən ibarətdir.
Donald Tramp 1946-cı il iyunun 14-də doğulub. 1968-ci ildə Pensilvaniya Universitetinin Uorton Biznes Məktəbini bitirib.
Uzun illər tikinti biznesi ilə məşğul olan Donald Tramp 1999-cu ildə Respublikaçılar Partiyasına qoşulub.
2016-cı il noyabrın 8-də keçirilmiş prezident seçkisində Respublikaçılar Partiyasının namizədi olmuş Donald Tramp Demokratlar Partiyasından Hillari Klintonu məğlub edib. O, 538 nəfərlik Seçicilər Kollegiyasına 306, Hillari Klinton isə 232 nümayəndə qazanıb.
Seçicilər Kollegiyası 2016-cı il dekabrın 19-da prezident seçkisi ilə bağlı yekun qərarını verib. Səsvermədə 304 nəfər Donald Trampı, 227 nəfər Hillari Klintonu dəstəkləyib. Seçicilər Kollegiyasındakı səsvermənin nəticəsi Konqresin 2017-ci il yanvarın 6-da keçirilən iclasında təsdiqlənib, yanvarın 20-də Donald Tramp səlahiyyətlərinin icrasına başlayıb.
Cozef Bayden 1942-ci il noyabrın 20-də doğulub. 1965-ci ildə Delaver Universitetini tarix və politologiya ixtisasları ilə, 1968-ci ildə isə Sirakus Universitetinin Hüquq Məktəbini bitirib.
Bir müddət hüquqşünas kimi fəaliyyət göstərən Cozef Bayden 1972, 1978, 1984, 1990, 1996, 2002 və 2008-ci illərdə ABŞ Konqresinin yuxarı palatası olan Senatın üzvü seçilib.
1987-1995-ci illərdə Senatın Məhkəmə Komitəsinə, 2001-2003 və 2007-2009-cu illərdə Xarici Əlaqələr Komitəsinə sədrlik edib.
2009-2017-ci illərdə – Barak Obamanın prezidentliyi dövründə vitse-prezident postunu tutub.
İlkin Nizami
