Su təsərrüfatında yenilik
Nazirlər Kabineti su təsərrüfatı balanslarının respublika, su hövzələri və inzibati ərazi vahidləri üzrə tərtib edilməsi qaydasını yeniləyib. Novator.az-ın məlumatına görə, ölkə üzrə illik su təsərrüfatı balansını rəsmiləşdirən 1 nömrəli əlavə dəyişdirilib. Həmin balans son üç ilin faktiki (rejim) məlumatları, cari ilin gözlənən, növbəti ilin isə rüblük və illik proqnoz göstəriciləri əsasında tərtib edilir.
Qaydaya əsasən, su təsərrüfatı balansları müvafiq ərazidə su ehtiyatları ilə suya tələbatın müqayisəli hesabat materiallarından ibarətdir, respublika, su hövzələri və inzibati ərazi vahidləri üzrə hazırlanır.
Ekologiya və Təbii Sərvətlər Nazirliyi hər il iyun ayının sonunadək Fövqəladə Hallar Nazirliyi, “Azərbaycan Meliorasiya və Su Təsərrüfatı” Açıq Səhmdar Cəmiyyəti və “Azərsu” Açıq Səhmdar Cəmiyyəti, həmçinin Naxçıvan Muxtar Respublikasının Ekologiya və Təbii Sərvətlər Nazirliyi ilə birlikdə respublika üzrə illik su təsərrüfatı balansının layihəsini tərtib etməyə məsuldur. Bu quruma həmçinin respublika üzrə illik su təsərrüfatı balansını və ona əlavə olunan su hövzələri və inzibati ərazi vahidləri üzrə su təsərrüfatı balanslarının layihələrini tərtib edərək hər il avqust ayının 15-dək Nazirlər Kabinetinə təqdim etmək tapşırılıb.
