Sərhəd pozucusu öldürülüb
Dövlət Sərhəd Xidmətinin məlumatına görə, sentyabrın 17-də külli miqdarda narkotik vasitənin qaçaqmalçılıq yolu ilə Azərbaycan ərazisinə keçirilməsinin qarşısı alınıb. Qeyd olunur ki, Sərhəd Qoşunlarının “Horadiz” sərhəd dəstəsinin xidmət apardığı Beyləqan rayonunun İkinci Şahsevən kəndi yaxınlığında 2 şəxsin İrandan Azərbaycan istiqamətində dövlət sərhədini pozması aşkar olunub: “Sərhəd pozucularının əllərində silah və yüklər müşahidə edilib. “Dayan” əmri verilərək havaya xəbərdarlıq atəşi açılsa da, sərhəd pozucuları əmrə tabe olmayıb, silah tətbiq etməklə geri qaçmağa cəhd ediblər. Silah tətbiq olunub, sərhəd pozucularından biri aldığı güllə yarasından hadisə yerində ölüb. Digər sərhəd pozucusu geri qaçıb.
Dövlət sərhədinin pozulması cəhdinin qarşısının alındığı əraziyə baxış zamanı 1 ədəd tüfəng, 2 ədəd çantada təxmini çəkisi 15 kiloqram olan narkotikə bənzər maddə aşkar edilib.
Sərhəd pozucuları ilə görüşərək onlardan yükü təhvil almağa gəlmiş və sərhəd zastavasının mühəndis-texniki çəpərindəki məftilləri qıraraq sərhəd zolağına daxil olmuş Azərbaycan vətəndaşı, 1975-ci il təvəllüdlü Beyləqan rayon sakini Məmmədov Adiş Cavad oğlu tutulub, üzərində sərhəd pozucularına vermək üçün gətirdiyi 10 ədəd şüşə qabda alkoqollu içkilər aşkar olunub”.
