Avropa Məhkəməsindən Mirqədirov qərarı
Sentyabrın 17-də Avropa İnsan Hüquqları Məhkəməsi jurnalist Rauf Mirqədirovun Azərbaycan dövlətindən şikayətini təmin edib. Jurnalistin Avropa İnsan Hüquqları Konvensiyası ilə verilmiş azadlıq və toxunulmazlıq, ədalətli məhkəmə araşdırması, şəxsi həyatın toxunulmazlığı hüquqlarının pozulduğunu əsas götürən məhkəmə Azərbaycan dövlətinin ona 20 min avro təzminat ödəməsinə qərar verib.
Novator.az bildirir ki, 1961-ci il təvəllüdlü Rauf Mirqədirov uzun illər “Zerkalo” qəzetinin siyasi icmalçısı olub, 2010-cu ildən qəzetin Türkiyədə xüsusi müxbiri postunda çalışıb.
2014-cü il aprelin 19-da tutulan jurnalist dövlətə xəyanətdə təqsirli bilinib. İttihama görə, jurnalist Sülh və Demokratiya İnstitutunun xətti ilə Ermənistan xüsusi xidmət orqanlarına casusluq edib. 2015-ci il dekabrın 28-də Bakı Ağır Cinayətlər Məhkəməsi Rauf Mirqədirovu 6 il müddətinə azadlıqdan məhrum edib.
2016-cı il martın 17-də Bakı Apellyasiya Məhkəməsi jurnalistin cəzasını 5 il sınaq müddəti tətbiq olunmaqla şərti həbslə əvəzləyib və Rauf Mirqədirov məhkəmə zalından azadlığa buraxılıb.
2014-cü ilin dekabr ayında İsveçrədə Rauf Mirqədirovun həyat yoldaşına və iki qızına siyasi sığınacaq verilib. 2016-cı il sentyabrın 16-da Avropaya gedən Rauf Mirqədirov da İsveçrəyə sığınıb.
2017-ci il oktyabrın 3-də Ali Məhkəmə jurnalist Rauf Mirqədirov barəsindəki son hökmü qüvvədə saxlayıb.
